Андижон вилояти мактабгача ва мактаб таълими тизимидаги яроқсиз ҳолатда бўш турган давлат мулки объектлари бузилади. Вилоят ҳокими Шуҳрат Абдураҳмоновнинг шу борадаги тегишли қарори қабул қилинган.
Андижон вилояти Қурилиш соҳасида назорат инспекцияси хулосаси ҳамда Мактабгача ва мактаб таълими бошқармаси хатига асосан қабул қилинган қарорга кўра, 20 та боғча ва мактаб биноси бузилади. Ҳужжатда таълим бошқармаси биноларни бузишдан олинган яроқли материалларни балансда сақловчи ташкилотларга кирим қилишни таъминлаши белгиланган. Бузилишдан бўшаган ер майдонлари таълим бошқармаси балансида қолдирилади.
Бузилиши белгиланган бинолар вилоят бўйича 20 та бўлиб, шулардан иккитаси Андижон шаҳрида жойлашган. Андижон туманида — битта, Асакада, Бўстон, Жалақудуқ, Марҳамат ва Олтинкўлда — иккитадан, Шаҳрихонда эса учта объект бузилади. Шунингдек, Пахтаобод, Хўжаобод, Избоскан, Қўрғонтепада биттадан бино бузилади.
Биноларнинг энг эскиси 1937 йилда, яна иккитаси 1938 йилда қурилган. Яроқсиз ҳолатга келиб қолган бинолар орасида 1985 йилда қурилган мактабгача таълим ташкилоти иншооти ҳам мавжуд.
Февраль охирларида ижтимоий тармоқларда уста-қурувчилар Бухоро ихтисослаштирилган санъат мактабидаги мусиқа асбоби (пианино)нинг устига чиқиб, жамоатчиликнинг эътирозларига сабаб бўлувчи хатти-ҳаракатларни содир этгани ҳақида хабарлар тарқалганди.
Изоҳ (0)