O‘zbekistonda xalqaro standartlar asosida 15 ta maktab qurish bo‘yicha Yevropa tiklanish va taraqqiyot banki bilan o‘zaro kelishuvga erishildi. Bu haqda Maktabgacha va maktab ta’limi vazirligi xabar berdi.
Qayd etilishicha, Samarqand shahrida o‘tkazilayotgan Yevropa tiklanish va taraqqiyot banki Boshqaruvchilar kengashining 32-yillik yig‘ilishida Maktabgacha va maktab ta’limi vazirligi, Iqtisodiyot va moliya vazirligi hamda YTTB o‘rtasida mazkur loyihalar ijrosiga doir uch tomonlama Texnik yordam berish shartnomasi imzolangan.
Ta’kidlanishicha, bu boradagi o‘zaro hamkorlik ishlari 2021-yil Toshkent shahrida o‘tkazilgan O‘zbekiston iqtisodiy forumi doirasida boshlangan. Hamkorlik doirasida respublika hududlarida bosqichma-bosqich davlat-xususiy sheriklik asosida yangi davlat umumta’lim maktablari faoliyati yo‘lga qo‘yilishi, ularga xususiy sheriklar tomonidan xizmat ko‘rsatilishi va ta’mirlanishi hamda bugungi kunda faoliyat yuritayotgan davlat umumta’lim maktablarini rekonstruksiya qilish, qo‘shimcha binolar qurish va ta’mirlash ishlari amalga oshirilishi rejalashtirilgan.
Jarayonning dastlabki bosqichi sifatida Yevropa rivojlanish va taraqqiyot banki mutaxassislari tomonidan grant olish va maslahatchilarni yollash bo‘yicha ichki tahlillar o‘tkazilgan hamda mamlakatning Namangan va Farg‘ona viloyatlaridagi 15 ta maktab loyihaga qamrab olingan. Loyihaning kapital qiymati 55–75 million dollarni tashkil etadi.
Bundan oldin Yevropa tiklanish va taraqqiyot banki Qoraqalpog‘istonda 100 MVt quvvatga ega shamol elektr stansiyasi qurilishini moliyalashtirish uchun ACWA Power Wind Karatau korxonasiga 19,3 million dollar miqdorida kredit ajratishi ma’lum bo‘lgandi. Shuningdek, bank Uzbekistan Airports AJga O‘zbekiston xalqaro aeroportlarida aeroport uskunalarini modernizatsiya qilish uchun 28 million yevrogacha bo‘lgan uzoq muddatli moliyalashtirishni taqdim etadi.
Izoh (0)