Gonkong bojxona boshqarmasi havo kompressorining qismlari sifatida yashiringan oltin jo‘natmasini aniqladi. Bu haqda South China Morning Post xabar bermoqda.
Kontrabanda oltinning qiymati rekord darajadagi 84 million Gonkong dollariga (taxminan 10,7 million AQSH dollari) baholanmoqda.
Hujjatlarga ko‘ra, Gonkong aeroportidan Yaponiyaga jo‘natishga tayyorlanayotgan yuk ichida umumiy og‘irligi 775 kg bo‘lgan ikkita havo kompressori bo‘lgan. Rentgen tekshiruvidan so‘ng bojxonachilar yukni ochib tekshirishga qaror qilishdi. Keyinchalik ma‘lum bo‘lishicha, ikkita rotor, tishli va uchta vintli millar sof oltindan quyilib, kulrang bo‘yoq bilan bo‘yalgan. Ushbu qismlarning umumiy og‘irligi 146 kg ni tashkil qildi.
Yuk jo‘natayotgan kompaniyaning 31 yoshli direktori qo‘lga olindi. Keyinchalik audit tekshiruvi korxona hech qanday tadbirkorlik faoliyati bilan shug‘ullanmaganligini va kontrabanda uchun maxsus tashkil etilgan bo‘lishi mumkinligini ko‘rsatdi. Kompaniya direktori yetti yilgacha qamoq jazosi va 2 million Gonkong dollari (taxminan 256,4 ming AQSH dollari) miqdorida jarimaga tortilishi mumkin.
Izoh (0)