19-fevralda boshlangan Yevropa Ittifoqining Qizil dengizdagi kemalarni himoya qilish bo‘yicha “Aspides” nomli missiyasi a’zolari 68 ta kemani kuzatib, 11 ta hujumni qaytardi.
Bu haqda Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel Bryusseldagi matbuot anjumanida ma’lum qildi.
“Operatsiya boshlanganidan keyin ikki oydan kamroq vaqt ichida 68 ta kema qo‘riqlab, kuzatib qo‘yildi va 11 ta hujum qaytarildi”, — dedi u.
Borrelning so‘zlariga ko‘ra, husiylar navigatsiya erkinligiga to‘sqinlik qilgani uchun Yevropa Ittifoqi Qizil dengizdagi vaziyatga aralashishga majbur bo‘lgan. Uning ta’kidlashicha, savdo tahdid ostida qolib, yuk tashish narxi oshgan.
“Masalan, Xitoydan Yevropaga dengiz orqali boradigan konteyner narxi ikki baravar oshdi”, deb tushuntirdi u va “vaziyatga aralashish zarur edi”, deb ta’kidladi.
Borrel, shuningdek, Yevropa Ittifoqi missiyasi sof mudofaa ekanligini va husiylarga qarshi hech qanday operatsiya o‘tkazmasligini aytdi.
Izoh (0)