O‘zbekistonning Buyuk Britaniyadagi elchisi Ravshan Usmanov Global Partners Governance (GPG) nodavlat notijorat tashkiloti direktori Mett Karter bilan uchrashuv o‘tkazdi. Bu haqda “Dunyo” agentligi xabar berdi.
Taʼkidlanishicha, GPG strategik tahlil va maslahat xizmatlarini ko‘rsatish, davlat boshqaruvini rivojlantirish dasturlarini ishlab chiqish, tadqiqotlar va nashrlar, onlayn kurslar va treninglar xizmatini ko‘rsatish kabi yo‘nalishlarda faoliyat olib boradi.
GPG va O‘zbekiston Oliy Majlisi Qonunchilik palatasi o‘rtasida 2021—2022-yillarda bir qator loyihalar amalga oshirilgan. O‘zbekiston tomoni bilan hamkorlikni davom ettirishdan manfaatdormiz, — dedi Mett Karter.
Uchrashuv yakunida O‘zbekiston Oliy Majlisi Senati va Qonunchilik palatasi aʼzolari hamda respublika davlat organlari xodimlari uchun Britaniyada malaka oshirish kurslari va stajirovkalarini tashkil etish masalasini o‘rganib chiqish bo‘yicha kelishuvga erishilgan.
2005-yilda tashkil etilgan GPG rivojlanayotgan mamlakatlarda parlamentarizm va davlat boshqaruvini rivojlantirish dasturlari hamda ijtimoiy loyihalarni amalga oshirishga ixtisoslashgan Britaniyaning yetakchi NNTlaridan biri hisoblanadi. Hozirgi paytda ushbu tashkilot dunyoning 40 dan ortiq mamlakatida faoliyat yuritadi.
Eslatib o‘tamiz, 2021-yilda O‘zbekiston Qurolli kuchlari Britaniya harbiy bazalarida malaka oshirishi mumkinligi to‘g‘risida xabar berilgandi.
Izoh (0)