O‘zbekiston mudofaa vaziri general-leytenant Bahodir Qurbonov Buyuk Britaniya va Shimoliy Irlandiya birlashgan qirolligi Qurolli kuchlari vaziri Jeyms Xippi bilan uchrashuv o‘tkazdi, deb xabar beradi vazirlik matbuot xizmati.
“O‘zbekiston 24” telekanali orqali uzatilgan lavhada aytilishicha, Jeyms Xippi Afg‘onistonning yangi hukumati bilan bog‘liq vaziyatga O‘zbekiston qanday nuqtai-nazar bilan qarashi Britaniya tomoniga juda muhimligini ta’kidlagan.
“Afg‘onistondagi vaziyat tez suratlarda rivojlanib bormoqda. Tashrifim maqsadi ham shu masalaga oydinlik kiritishdir. Chunki siz qo‘shni O‘zbekiston vaziyatni bizdan yaxshi bilasiz. Vazirlik darajasidagi uchrashuvlarda biz Afg‘oniston tomonidan sodir etilishi mumkin bo‘lgan xavf-xatarga O‘zbekistonning pozitsiyasini o‘rganmoqdamiz”, — deydi u.
Uchrashuv doirasida O‘zbekiston Mudofaa vazirligi hamda Britaniya va Shimoliy Irlandiya Birlashgan Qirolligi Mudofaa vazirliklari o‘rtasida 2021−2022-yilga mo‘ljallangan hamkorlik rejasi imzolangan.
Britaniya Qurolli kuchlari vaziri so‘zlariga ko‘ra, ushbu kelishuv Buyuk Britaniya va O‘zbekiston qo‘shinlari birgalikda mashg‘ulotlarni o‘tkazishlari uchun mustahkam asos yaratadi. Shuningdek, O‘zbekiston qurolli kuchlari Birlashgan Qirollik harbiy bazalarida malaka oshirishi yoki u yerda o‘tkaziladigan harbiy o‘yinlarda ishtirok etishlari mumkin.
“O‘z navbatida Britaniya tomoni uchun ham bu katta imkoniyat. Negaki bizning ham sizlardan o‘rganadigan jihatlarimiz ko‘p”, — deydi Jeyms Xippi.
Shuningdek, Buyuk Britaniya delegatsiyasi kun davomida Qurolli kuchlar akademiyasi va “G‘alaba bog‘i” majmuasi hamda undagi “Shon-sharaf” muzeyi bilan ham yaqindan tanishgan yuqori martabali xorijlik mehmon Qurolli kuchlar akademiyasida yaratilgan shart-sharoitlarga yuksak baho bergan. G‘alaba bog‘i majmuasida esa Zulfiya Zokirovaga o‘rnatilgan yodgorlik poyiga gulchambar qo‘yib, hurmat bajo keltirgan.
Izoh (0)