Ўзбекистоннинг Буюк Британиядаги элчиси Равшан Усманов Global Partners Governance (GPG) нодавлат нотижорат ташкилоти директори Мэтт Картер билан учрашув ўтказди. Бу ҳақда “Дунё” агентлиги хабар берди.
Таъкидланишича, GPG стратегик таҳлил ва маслаҳат хизматларини кўрсатиш, давлат бошқарувини ривожлантириш дастурларини ишлаб чиқиш, тадқиқотлар ва нашрлар, онлайн курслар ва тренинглар хизматини кўрсатиш каби йўналишларда фаолият олиб боради.
GPG ва Ўзбекистон Олий Мажлиси Қонунчилик палатаси ўртасида 2021—2022 йилларда бир қатор лойиҳалар амалга оширилган. Ўзбекистон томони билан ҳамкорликни давом эттиришдан манфаатдормиз, — деди Мэтт Картер.
Учрашув якунида Ўзбекистон Олий Мажлиси Сенати ва Қонунчилик палатаси аъзолари ҳамда республика давлат органлари ходимлари учун Британияда малака ошириш курслари ва стажировкаларини ташкил этиш масаласини ўрганиб чиқиш бўйича келишувга эришилган.
2005 йилда ташкил этилган GPG ривожланаётган мамлакатларда парламентаризм ва давлат бошқарувини ривожлантириш дастурлари ҳамда ижтимоий лойиҳаларни амалга оширишга ихтисослашган Британиянинг етакчи ННТларидан бири ҳисобланади. Ҳозирги пайтда ушбу ташкилот дунёнинг 40 дан ортиқ мамлакатида фаолият юритади.
Эслатиб ўтамиз, 2021 йилда Ўзбекистон Қуролли кучлари Британия ҳарбий базаларида малака ошириши мумкинлиги тўғрисида хабар берилганди.
Изоҳ (0)