Mudofaa vazirligi “Vatan himoyasi va el-yurt tinchligi yo‘lida halok bo‘lgan harbiy xizmatchilar (xodimlar) oila aʼzolarini ijtimoiy qo‘llab-quvvatlashni kuchaytirish chora-tadbirlarining ijrosini taʼminlash to‘g‘risida”gi Vazirlar Mahkamasi qarori loyihasini muhokamaga qo‘ydi.
Prezidentning “Vatan himoyasi va el-yurtimiz tinchligi yo‘lida halok bo‘lgan harbiy xizmatchilar va xodimlar oila a’zolarini ijtimoiy qo‘llab-quvvatlashni kuchaytirish chora-tadbirlari to‘g‘risida”gi farmoniga muvofiq Mudofaa Ichki ishlar, Favqulodda vaziyatlar vazirliklari, Milliy gvardiya, DXX, Prezident davlat xavfsizlik xizmati, Harbiy prokuratura, Bojxona qo‘mitasi va Elektron texnologiyalarni rivojlantirish markazining vatan himoyasi va el-yurt tinchligi yo‘lida yaralangani, kontuziya yoki mayib bo‘lgani oqibatida halok bo‘lgan harbiy xizmatchi va xodimlarining oila a’zolari uchun quyidagilar belgilangan:
- O‘zbekiston hududidagi sanatoriy-kurort muassasalari va bolalarni sog‘lomlashtirish oromgohlarida yiliga bir marta bepul sog‘lomlashtirish;
- shifokorlarning retseptlariga asosan 3 oylik ehtiyojidan kelib chiqib dori vositalarini (yiliga bir marta), tibbiy va maxsus protez ortopediya moslamalarini olib berish hamda jarrohlik amaliyotlarining xarajatlarini qoplash;
- og‘ir tashxisli kasallik hamda nogironligi bo‘lganlarga shifokorlarning retseptlariga muvofiq, yiliga bir marta dori vositalarining 50 foizigacha bo‘lgan summasini kompensatsiya qilish.
Quyidagilarni nazarda tutuvchi — vatan himoyasi va el-yurt tinchligi yo‘lida halok bo‘lgan harbiy xizmatchilar (xodimlar) oila a’zolarini O‘zbekiston hududidagi sanatoriy-kurort muassasalari va bolalarni sog‘lomlashtirish oromgohlarida sog‘lomlashtirish, dori vositalarini, tibbiy va maxsus protez-ortopediya moslamalarini olib berish, og‘ir tashxisli kasalliklari hamda nogironligi bo‘lganlarga dori vositalarining 50 foizigacha bo‘lgan summasini kompensatsiya qilish, jarrohlik amaliyotlarining xarajatlarini qoplash tartibi to‘g‘risidagi nizom tasdiqlanadi:
- Vatan himoyasi va el-yurt tinchligi yo‘lida halok bo‘lgan harbiy xizmatchilar (xodimlar) oila aʼzolarining O‘zbekiston Respublikasi hududidagi sanatoriy-kurort muassasalari va bolalarni sog‘lomlashtirish oromgohlarida sog‘lomlashtirilishini tashkillashtirish;
- Vatan himoyasi va el-yurt tinchligi yo‘lida halok bo‘lgan harbiy xizmatchi (xodimlar)ning oila aʼzolarini dori vositalari, tibbiy va maxsus protez-ortopediya moslamalari bilan taʼminlash;
- Vatan himoyasi va el-yurt tinchligi yo‘lida halok bo‘lgan harbiy xizmatchi (xodimlar)ning og‘ir tashxisli kasalliklari va nogironligi bo‘lgan oila aʼzolariga dori vositalari summasini kompensatsiya qilish hamda jarrohlik amaliyotlarining xarajatlarini qoplash.
Eslatib o‘tamiz, 2023-yilda halok bo‘lgan harbiy xizmatchilar va xodimlarning oila a’zolariga belgilangan imtiyoz va kafolatlarni tatbiq etish tartibini belgilovchi normativ-huquqiy hujjatlar hamda “Faxriylar to‘g‘risida”gi, “Harbiy xizmatchilar maqomi va ularni ijtimoiy himoya qilish to‘g‘risida”gi va “Harbiy xizmatchilarning pensiya ta’minoti to‘g‘risida”gi qonun loyihalari ishlab chiqilayotgani to‘g‘risida xabar berilgandi.
Izoh (0)