AQSH Davlat departamentining Terrorizmga qarshi kurashishga ko‘maklashish dasturi (ATA) vakillari O‘zbekiston davlat bojxona qo‘mitasiga tashrif buyurdi. Bu haqda qo‘mita matbuot xizmati xabar berdi.
Uchrashuvda Bojxona qo‘mitasi rais o‘rinbosari Nodir Musamuhamedov ishtirok etgan tadbirda qo‘mita tomonidan xalqaro terrorizmga qarshi kurashish, narkotik va boshqa noqonuniy tovarlarning harakatini oldini olish bo‘yicha amalga oshirilayotgan ishlar alohida eʼtirof etilgan.
Shu bilan birga, uchrashuvda ATA dasturi tomonidan 2024-yildan boshlab O‘zbekistonning huquqni muhofaza qiluvchi organlari uchun terrorizmga qarshi kurashish bo‘yicha hamkorlikda maxsus taktik o‘quv kurslari o‘tkazilishi rejalashtirilgani maʼlum qilingan.
“Tadbir davomida ATA dasturi rahbari Maykl Tvining bilan hamkorlik masalalari to‘g‘risida o‘zaro fikr almashildi”, — deyiladi xabarda.
Shavkat Mirziyoyev 19-may kuni Markaziy Osiyo—Xitoy sammitida maxsus xizmatlar o‘rtasida hamkorlikni yo‘lga qo‘yishni taklif qilgandi. “Markaziy Osiyo davlatlari va Xitoy maxsus xizmatlari va huquqni muhofaza qilish idoralari o‘rtasida uch yovuz kuch, narkotrafik, transchegaraviy va kiber jinoyatchilikka qarshi kurashda yaqin hamkorlikni yo‘lga qo‘yishni taklif etamiz”, — degan edi davlat rahbari.
Izoh (0)