Мексика президенти Андрес Мануэль Лопес Обрадор ташқи ишлар вазири Алисия Барсенага Эквадор билан дипломатик муносабатларни узиш ҳақида кўрсатма берди. Бу ҳақда Мексика давлати раҳбари 6 апрель куни Х ижтимоий тармоғида хабар қилди.
Маълум бўлишича, мазкур қарор Эквадор полициясининг 2023 йил декабридан буён Эквадор собиқ вице-президенти Хорхе Глас истиқомат қилаётган Китодаги Мексика элчихонасига мажбуран киритилиши билан боғлиқ. У Мексикадан сиёсий бошпана сўраган.
Ҳолат юзасидан Мексика ташқи ишлар вазири Алисия Барсена Мехико шаҳри Эквадорни халқаро ҳуқуқни бузганликда айблаб, Халқаро судга мурожаат қилишини айтган. ТИВ раҳбари таъкидлаганидек, элчихонага бостириб кириш чоғида бир неча мексикалик дипломат жароҳатланган.
6 апрелга ўтар кечаси Эквадор полицияси Китодаги Мексика элчихонасига кириб, у ерда Эквадор расмийларидан яшириниб юрган мамлакат собиқ вице-президенти Хорхе Гласни ҳибсга олган. Глас ватанида порахўрлик ва коррупцияда айбланмоқда. У 2017 йилдан 2022 йилгача Эквадор қамоқхонасида бўлган.
Мексика президенти Лопес Обрадор мамлакат элчихонасига бостириб киришни “халқаро ҳуқуқ ва суверенитетни қўпол равишда бузиш” деб атади. Бундан олдин, Эквадор президентининг идораси Эквадор суверен давлат эканлигини таъкидлаб, Кито бирорта жиноятчининг озод бўлишига йўл қўймаслигини айтган эди.
Мексиканинг Китодаги элчихонаси биносидаги ҳолатни кузатган экспертлар ушбу ҳаракатлар “Консуллик муносабатлари тўғрисидаги Вена конвенцияларини қўпол равишда бузиш эканлигини ва бу мамлакат ҳукуматлари ўртасида кучли низо келтириб чиқариши мумкин”лигини таъкидлаган.
Изоҳ (0)