AQSH kelasi hafta Suriyadagi konsullikka uyushtirilgan hujumga Eronning ehtimoliy javobini kutmoqda. Bu haqda AQSH prezidenti Jo Bayden ma’muriyatidagi manbalariga tayanib, CNN xabar berdi.
Ehtimoliy hujum Bayden va Isroil bosh vaziri Binyamin Netanyaxu o‘rtasidagi asosiy muhokama mavzusiga aylangan edi.
Eronning Isroil hududiga to‘g‘ridan to‘g‘ri hujum qilishi AQSH tayyorlayotgan eng yomon ssenariylardan biridir. Bunday zarba keng ko‘lamli mintaqaviy urushga olib kelishi mumkin, — deb ta’kidlaydi CNN.
Avvalroq Oq uy Milliy xavfsizlik kengashining strategik aloqalar bo‘yicha koordinatori Jon Kirbi Vashington Eron va Isroil o‘rtasida keng ko‘lamli urush boshlanishi ehtimolidan xavotirda ekanini aytgandi.
Isroilning i24News telekanali mamlakat Eronning Suriyadagi konsulligiga havo hujumi uyushtirganidan keyin Erondan ehtimoliy hujumlarga tayyorlanayotgani haqida xabar bergan.
4-aprel kuni Eron rahbari Oyatulloh Ali Xomanaiy o‘zining X sahifasida ibroniy tilida post yozib, Isroilni konsullik bo‘limiga havo hujumi uyushtirgani uchun tavba qilishga majburlashini ma’lum qilgan.
Eronning Damashqdagi elchixonasida 13 kishi, jumladan, Islom inqilobi qo‘riqchilari korpusining ikki generali halok bo‘lgan. Shuningdek, yetti nafar harbiy maslahatchi — generallar Muhammad Rizo Zohidiy va Muhammad Hodi Hoji Rahimiy hamda besh ofitserning o‘limi haqida xabar qilingan edi.
Izoh (0)