Turkiya xavfsizlik xizmati 8 nafar shaxsni Isroil razvedka boshqarmasi xodimlariga turkiyalik ayrim shaxslar va kompaniyalar haqida maʼlumot berganlikda ayblab hibsga oldi. Bu haqda Anadolu nashri xabar berdi.
Xabarda aytilishicha, Turkiya maxsus xizmatlari “MOLE-3” operatsiyasi doirasida Isroil razvedka agentliklari uchun ishlagan shaxslar va tashkilotlarni aniqlashga kirishgan. Tezkor operatsiyada ularning bir qanchasi qo‘lga olingan.
Operatsiya davomida sakkiz nafar gumondor qo‘lga olingan bo‘lib, ulardan ikki nafari rasman qamoqqa olingan. Olti nafarining ishi sud tizimida ko‘rib chiqilmoqda.
“Mamlakatimiz chegaralarida milliy birligimiz va birdamligimizga qarshi josuslik faoliyatiga hech qachon yo‘l qo‘ymaymiz”, — deyiladi Turkiya rasmiylari bergan bayonotda.
Turkiya ichki ishlar vaziri Ali Yerlikaya maʼlum qilishicha, operatsiya Istanbul viloyati terrorizmga qarshi kurash bo‘limi boshqarmasi tomonidan Istanbul bosh prokuraturasi, Milliy razvedka tashkiloti, xavfsizlik razvedkasi va kontrrazvedka bosh boshqarmasi bilan hamkorlikda amalga oshirilgan.
Izoh (0)