Birlashgan Millatlar Tashkilotining Inson huquqlari kengashi Isroilni G‘azo sektoridagi inson huquqlarini buzgani uchun javobgarlikka tortishga chaqiruvchi rezolyutsiyani qabul qildi. Rezolyutsiya Pokiston tomonidan taqdim etilgan. Isroilning BMTdagi doimiy vakili Meyrav Eylon Shaxarning aytishicha, qabul qilingan hujjat butun tashkilotning obro‘siga soya soladi.
“Bosib olingan Falastin hududi, jumladan, Sharqiy Quddusdagi inson huquqlari ahvoli, shuningdek, javobgarlik va adolatni ta’minlash bo‘yicha majburiyatlar to‘g‘risida rezolyutsiya loyihasi qabul qilindi”, — deya xabar berdi BMTning Inson huquqlari bo‘yicha qo‘mitasi.
Rezolyutsiyani aʼzo 28 davlat qo‘llab-quvvatladi. 13 a’zo betaraf, 6 a’zo, jumladan, AQSH va Germaniya qarshi ovoz berdi. Pokistonning BMTdagi doimiy vakili Bilol Ahmadning aytishicha, “loyiha bosib olingan Falastin hududida, xususan, G‘azo sektorida inson huquqlarining qo‘pol buzilishiga javob tariqasida ishlab chiqilgan”.
“Ushbu kengash va uning ko‘plab aʼzolari uchun muhim bo‘lgan narsa Isroilni qoralash, yagona yahudiy davlatini tanqid qilish va HAMAS, Falastin maʼmuriyati va mamlakatimizni yo‘q qilmoqchi bo‘lganlarning barchasini himoya qilishdir. Bu rezolyutsiya Inson huquqlari kengashi va butun BMTning obro‘siga soya soladi”, dedi Isroilning BMTdagi doimiy vakili.
Shuningdek, u Belgiya, Finlyandiya va Lyuksemburg kabi baʼzi Yevropa davlatlari bu rezolyutsiyani qo‘llab-quvvatlaganidan hafsalasi pir bo‘lganini taʼkidladi.
Bundan tashqari, bugun BMT Inson huquqlari bo‘yicha komissiyasi ham Falastin xalqining o‘z taqdirini o‘zi belgilash huquqi to‘g‘risida rezolyutsiya qabul qildi. AQSH Paragvay bilan birga unga qarshi ovoz berdi. Albaniya, Argentina va Kamerun betaraf qoldi, qolgan hamma hujjatni qo‘llab-quvvatladi.
Bir kun oldin prezident Jo Bayden Isroil bosh vaziri Binyamin Netanyaxu bilan telefon orqali gaplashdi. Oq uy veb-saytida e’lon qilingan xabarga ko‘ra, suhbatda Jo Bayden AQSHning G‘azodagi urushni kelajakda qo‘llab-quvvatlashi uchun Isroil tinch aholi va gumanitar xodimlarni himoya qilish bo‘yicha yangi qadamlar qo‘yishi shart ekanligini aytib o‘tdi.
Izoh (0)