Туркия хавфсизлик хизмати 8 нафар шахсни Исроил разведка бошқармаси ходимларига туркиялик айрим шахслар ва компаниялар ҳақида маълумот берганликда айблаб ҳибсга олди. Бу ҳақда Anadolu нашри хабар берди.
Хабарда айтилишича, Туркия махсус хизматлари “МОЛЕ-3” операцияси доирасида Исроил разведка агентликлари учун ишлаган шахслар ва ташкилотларни аниқлашга киришган. Тезкор операцияда уларнинг бир қанчаси қўлга олинган.
Операция давомида саккиз нафар гумондор қўлга олинган бўлиб, улардан икки нафари расман қамоққа олинган. Олти нафарининг иши суд тизимида кўриб чиқилмоқда.
“Мамлакатимиз чегараларида миллий бирлигимиз ва бирдамлигимизга қарши жосуслик фаолиятига ҳеч қачон йўл қўймаймиз”, — дейилади Туркия расмийлари берган баёнотда.
Туркия ички ишлар вазири Али Ерликая маълум қилишича, операция Истанбул вилояти терроризмга қарши кураш бўлими бошқармаси томонидан Истанбул бош прокуратураси, Миллий разведка ташкилоти, хавфсизлик разведкаси ва контрразведка бош бошқармаси билан ҳамкорликда амалга оширилган.
Изоҳ (0)