Janubiy Koreyada davlatga tegishli yerlarni noqonuniy egallab olmaslik, noqonuniy turar joylar qurmaslik haqida maktab darsliklari orqali bolaga tushuncha va bilim berib boriladi. Bu haqda “Daryo”ga kuni kecha Seul shahridagi global markazda malaka oshirib kelgan Kadastr agentligi axborot xizmati rahbari Ne’mat Otamurodov gapirib berdi.
Bilasizmi, Koreya yerga bo‘lgan munosabatlarda, shuningdek, davlat yerlarini noqonuniy egallab olmaslik, noqonuniy turar joylar qurmaslik borasida bizdan 30-40 yil ilgarilab ketgan ekan. To‘g‘ri, bu davlatda ham ancha ilgari davlat yerini noqonuniy egallab olish, noqonuniy turar joylar qurish holatlari bo‘lgan. Ammo ayni kunga kelib, bu haqda umuman gap bo‘lishi mumkin emas ekan. Sababi bu davlatda yerga bo‘lgan munosabat bolaga maktab davridayoq o‘rgatilarkan. Koreya yer, infrastruktura va transport vazirligi, yer hamda fazoviy ma’lumotlarni axborotlashtirish korporatsiyasining Seuldagi global markazida malaka oshirgan chog‘imizda bu haqda batafsil ma’lumot oldik, — deydi agentlik axborot xizmat rahbari Ne’mat Otamurodov.
Mas’ulning bildirishicha, Koreyada davlat yerlarini noqonuniy egallab olgan kishilarga nisbatan oy ostidagi odamlar atamasi qo‘llanilgan.
Ayni kunda O‘zbekistondagi eng asosiy muammolardan biri — yerlarni noqonuniy egallab olish, noqonuniy turar joy binolarini qurish masalasi ekani kundek ravshan. Biz bunga qarshi yoppasiga kurashyapmiz. Odamlarga noqonuniy turar joylar qurmasliklari kerakligi haqida bot-bot tushuntiryapmiz. Koreyadagi mas’ullar bilan gaplashganimizda ular “bu holatlar bizda ham bo‘lgan, asosan tog‘li hududlarda shu kabi voqealar sodir bo‘lgani uchun aynan shunday kimsalarni oy ostidagi odamlar deb ataganmiz”, deyishdi. Demak, har bir davlat buni boshidan o‘tkazadi. Lekin keyingi xulosa va natija ijobiy bo‘lishi lozim. Malaka oshirish kurslarmizda aynan shu holatlarga e’tibor qaratdik, — deydi mas’ul.
Ne’mat Otamurodovning qo‘shimcha ma’lumot berishicha, Kadastr agentligi xodimlaridan iborat 10 kishilik jamoaning malaka oshirish kurslari 20—29-mart kunlari bo‘lib o‘tgan.
Unda agentlik mas’ullari Koreya manzillar reyestri tizimi bilan tanishdi. Ushbu davlatning yer siyosati va kadastr tizimini o‘rgandik. Fazoviy ma’lumotlar yo‘nalishida kadrlarni tayyorlash siyosatini joriy etish, geofazoviy axborot siyosatining joriy holati, sun’iy yo‘ldosh tasvir platformasi va tasvir tahlilini joriy etish masalalarini o‘rgandik. Shuningdek, ko‘chmas mulk hujjatlarining tizimi bilan ishlash kabi mavzular bo‘yicha malakali mutaxassislar hamda professor o‘qituvchilardan bilim va ko‘nikmalar oldik, — deydi u.
Izoh (0)