Toshkentdagi yirik bozorlar ko‘p qavatli qilib qayta qurilishi mumkin

Toshkentda yer o‘ta cheklangan sharoitda bor infratuzilmani vertikal o‘stirish orqali sanoat va savdoni rivojlantirish zarur. Bu haqda prezident Xalq deputatlari Toshkent shahri kengashining navbatdan tashqari sessiyasida aytib o‘tdi.

Xususan, yirik bozorlarni qavat-qavat usulda kengaytirish, Yunusobod kichik sanoat zonasidagi binolarni 3-4 qavat qilib qayta qurish hisobiga qo‘shimcha maydonlarni hosil qilish imkoniyatlari ko‘rsatib o‘tildi.

Vazirlar Mahkamasiga unumli foydalanilmayotgan davlat obyektlarini xatlovdan o‘tkazib, ularni o‘rnida sanoat va xizmatlarda yuqori daromadli ish o‘rni yaratadigan loyihalarni joylashtirish dasturini tasdiqlash topshirildi.

Prezident yanvar oyida bozorlarning o‘ziga xos jihatlarini saqlab qolgan holda ularni O‘zbekistonning tashrif qog‘oziga aylantirish kerakligini ta’kidlagandi. Fevral oyida ayrim shahar va shaharchalarning bosh rejalari yo‘qligi sababli faqat eniga kengayayotganini, bu infratuzilma xarajatlari oshishiga olib kelayotganini aytgandi.