“Кореяда давлат ерларини ноқонуний эгаллаб олмаслик мактаб дарсликлари сифатида ўргатилади” — Кадастр агентлиги ахборот хизмати раҳбари

Жанубий Кореяда давлатга тегишли ерларни ноқонуний эгаллаб олмаслик, ноқонуний турар жойлар қурмаслик ҳақида мактаб дарсликлари орқали болага тушунча ва билим бериб борилади. Бу ҳақда “Дарё”га куни кеча Сеул шаҳридаги глобал марказда малака ошириб келган Кадастр агентлиги ахборот хизмати раҳбари Неъмат Отамуродов гапириб берди.

Биласизми, Корея ерга бўлган муносабатларда, шунингдек, давлат ерларини ноқонуний эгаллаб олмаслик, ноқонуний турар жойлар қурмаслик борасида биздан 30-40 йил илгарилаб кетган экан. Тўғри, бу давлатда ҳам анча илгари давлат ерини ноқонуний эгаллаб олиш, ноқонуний турар жойлар қуриш ҳолатлари бўлган. Аммо айни кунга келиб, бу ҳақда умуман гап бўлиши мумкин эмас экан. Сабаби бу давлатда ерга бўлган муносабат болага мактаб давридаёқ ўргатиларкан. Корея ер, инфраструктура ва транспорт вазирлиги, ер ҳамда фазовий маълумотларни ахборотлаштириш корпорациясининг Сеулдаги глобал марказида малака оширган чоғимизда бу ҳақда батафсил маълумот олдик, — дейди агентлик ахборот хизмат раҳбари Неъмат Отамуродов. 

Масъулнинг билдиришича, Кореяда давлат ерларини ноқонуний эгаллаб олган кишиларга нисбатан ой остидаги одамлар атамаси қўлланилган. 

Айни кунда Ўзбекистондаги энг асосий муаммолардан бири — ерларни ноқонуний эгаллаб олиш, ноқонуний турар жой биноларини қуриш масаласи экани кундек равшан. Биз бунга қарши ёппасига курашяпмиз. Одамларга ноқонуний турар жойлар қурмасликлари кераклиги ҳақида бот-бот тушунтиряпмиз. Кореядаги масъуллар билан гаплашганимизда улар “бу ҳолатлар бизда ҳам бўлган, асосан тоғли ҳудудларда шу каби воқеалар содир бўлгани учун айнан шундай кимсаларни ой остидаги одамлар деб атаганмиз”, дейишди. Демак, ҳар бир давлат буни бошидан ўтказади. Лекин кейинги хулоса ва натижа ижобий бўлиши лозим. Малака ошириш курслармизда айнан шу ҳолатларга эътибор қаратдик, — дейди масъул. 

Неъмат Отамуродовнинг қўшимча маълумот беришича, Кадастр агентлиги ходимларидан иборат 10 кишилик жамоанинг малака ошириш курслари 20—29 март кунлари бўлиб ўтган. 

Унда агентлик масъуллари Корея манзиллар реестри тизими билан танишди. Ушбу давлатнинг ер сиёсати ва кадастр тизимини ўргандик. Фазовий маълумотлар йўналишида кадрларни тайёрлаш сиёсатини жорий этиш, геофазовий ахборот сиёсатининг жорий ҳолати, сунъий йўлдош тасвир платформаси ва тасвир таҳлилини жорий этиш масалаларини ўргандик. Шунингдек, кўчмас мулк ҳужжатларининг тизими билан ишлаш каби мавзулар бўйича малакали мутахассислар ҳамда профессор ўқитувчилардан билим ва кўникмалар олдик, — дейди у.