Kadastr agentligi matbuot xizmati rahbari Neʼmat Otamurodov so‘nggi vaqtlarda ijtimoiy tarmoqlarda uy-joylar uchun kadastr hujjatlarini tayyorlashda aksiya bo‘lishi kutilayotgani to‘g‘risida tarqalgan xabarlarga izoh berdi.
Otamurodovning aytishicha, bu mavzudagi xabarlar ham juda ommalashib boryapti. “Bu xabarlarga biroz tuzatish kiritish kerak. Sababi, xabarlarda kadastr hujjatlarini tayyorlash jarayoni aksiya deb nomlanyapti. Aslida aksiya emas”, — deydi u.
Prezident boshchiligida 27-oktyabr kuni yer resurslaridan oqilona foydalanish, yer hisobini yuritish hamda kadastr xizmatlarini yaxshilash masalalari bo‘yicha o‘tkazilgan yig‘ilishda topografik o‘lchovlar uchun Kadastr agentligi maxsus samolyot va aerofotokamera, 112 ta dron bilan taʼminlanishi, sohani raqamlashtirish uchun esa 6 ta axborot tizimi va maʼlumotlar markazi ishga tushirilishi aytib o‘tilgandi.
Shuningdek, yig‘ilishda mamlakatda 2,4 millionta xonadonning egalik hujjati yo‘qligi, agar ularning kadastr hujjati qilinsa, odamlarga huquqiy, iqtisodiy jihatdan yordam bo‘lishi uqtirilgan. Shu bois, hujjatsiz uy-joylarga egalik huquqini berish bo‘yicha qonun loyihasini yakuniga yetkazish vazifasi qo‘yilgan.
Shuningdek, 2,4 millionta xonadonning egalik hujjati, ko‘chmas mulklarga egalik huquqi bo‘lmagan, kadastr hujjatlari mavjud bo‘lmagan uy-joylarga egalik huquqini berish maqsadida tegishli vazirlik va idoralarga qonun loyihasini ishlab chiqish topshirig‘i berilgan. Bugungi kunda qonun loyihasi ishlab chiqilmoqda.
“Haqiqatan ham ijtimoiy tarmoqlarda xabar tarqalganidan keyin, aholi o‘rtasida ‘uddaburonlar’ ko‘paydi. ‘Tezkorlik bilan imorat qurib olib, bu uyni 5-10 yil oldin qurganman deb iddao qilsam, hujjatlashtirib olaman’ deb o‘ylab yurgan bo‘lishlari mumkin. Ochig‘ini aytganda, ular xato o‘ylashmoqda. Sababi, Kadastr agentligi tomonidan yerlarning holatini o‘rganish bo‘yicha Kosmik syomkalar, xaritalar bor. Ular yordamida 5-10 yil, hatto 20 yil ortga qaytarib tekshirishimiz mumkin.
Bu jarayonda insonlar o‘zlariga zarar berishlari mumkin. Sababi birinchidan yerlarni o‘zboshimchalik bilan egallab olganlik, u yerga noqonuniy qurilmani amalga oshirganlik uchun qonunchilikda maʼmuriy javobgarlikdan, jinoiy javobgarlikkacha choralar belgilangan. Shuning uchun bunday toifadagi insonlar hozirgi kunda o‘zboshimchalik bilan imorat qurayotgan bo‘lsa, tezda bu ishlarni to‘xtatib, yerni asl holatiga qaytarishlarini so‘raymiz”, — deydi agentlik vakili.
Avvalroq O‘zbekistonda 2023-yil boshidan beri 3 ming gektardan ortiq yerlar o‘zboshimchalik bilan egallab olingani to‘g‘risida xabar berilgandi. Shundan qonun buzilishi holatini ixtiyoriy bartaraf etganlar soni 4235 taga yetgan.
Izoh (0)