Finlyandiyada Xelsinki chekkasidagi maktabda yuz bergan otishma natijasida bir bola halok bo‘ldi, kamida ikki kishi yaralandi. Bu haqda Euronews xabar berdi.
Xabarga ko‘ra, qo‘lga olingan gumonlanuvchi ham voyaga yetmagan.
Ma’lum bo‘lishicha, hodisa oqibatida 12 yoshgacha bo‘lgan uch nafar bola jarohat olgan. Ulardan biri vafot etgan. Voqea poytaxt Xelsinki chekkasidagi Vantaa shahridagi Viertola maktabida mahalliy vaqt bilan ertalab soat 9 dan keyin sodir bo‘lgani aytilmoqda.
Politsiyaning ma’lum qilishicha, gumondor 12 yoshda ekanligi taxmin qilinib, biroz vaqt o‘tib, poytaxtga yaqin hududda qo‘lga olingan. U politsiyaga hech qanday qarshilik ko‘rsatmagan. Uning yonida o‘qotar qurol borligi aniqlangan.
Politsiyaga ko‘ra, otishmada ishlatilgan qurol bolaning qarindoshiga tegishli.
Voqeadan so‘ng Vantaa hududida politsiya operatsiyasi davom etgan: rasmiylar mahalliy aholidan favqulodda vaziyat zonasidan uzoqroq turishni va uylarini tark etmaslikni so‘ragan. Voqea tafsilotlari hozircha ochiqlanmagan.
Ikki o‘quv binosidan iborat Viertola maktabida 1-sinfdan 9-sinfgacha bo‘lgan 800 ga yaqin o‘quvchi ta’lim oladi va 90 ga yaqin kishi ishlaydi. Shved tili guruhlari va boshqa maxsus ta’lim sinflari mavjud.
Izoh (0)