Farg‘ona viloyati So‘x tumanida yashovchi 27 yoshli N.R. ariza bilan murojaat qilib, o‘ziga tegishli bo‘lgan bank kartasidan 2 mln 720 ming so‘m miqdoridagi pul mablag‘lari nomaʼlum shaxs tomonidan o‘zlashtirilganini maʼlum qilgan. Bu haqda Kiberxavfsizlik markazi matbuot xizmati xabar berdi.
Maʼlum qilinishicha, o‘tkazilgan tezkor-qidiruv tadbirlari natijasida, mazkur jinoyatni Farg‘ona viloyati So‘x tumanida yashovchi muqaddam JKning 168-moddasi bilan (firibgarlik) sudlangan 24 yoshli E.M. sodir etganligi aniqlangan.
Unga ko‘ra, E.M. jabrlanuvchi N.R.ga SMS xabarnoma (soxta havola) yuborish orqali shaxsiy maʼlumotlarini qo‘lga kiritib, uning bank mobil ilovasiga ikkinchi foydalanuvchi sifatida ulanib olgan va 2 mln 720 ming so‘mni o‘zining foydalanuvida bo‘lgan bank plastik kartasiga o‘tkazib olgan.
Mazkur holat yuzasidan JKning 168-moddasi 3-qismi “b, g” bandi (firibgarlik takroran yoki xavfli retsidivist tomonidan; axborot tizimidan, shu jumladan, axborot texnologiyalaridan foydalanib sodir etilgan bo‘lsa) bilan jinoyat ishi qo‘zg‘atilib, E.M.ning boshqa shu turdagi jinoyatlarga aloqadorligini tekshirish yuzasidan tezkor-surishtiruv ishlari olib borilmoqda.
Izoh (0)