2001–2005-yillar davomida O‘zbekiston birinchi prezidentining matbuot kotibi lavozimida faoliyat ko‘rsatgan, hozirda “Yangi media” taʼlim markazi direktori Beruniy Alimov “Daryo” bilan suhbat davomida Islom Karimovning OAV va jurnalistlarga bo‘lgan eʼtibori haqida gapirib o‘tdi.
Beruniy Alimovning taʼkidlashicha, O‘zbekistonning birinchi prezidenti nafaqat jurnalistikaning jamiyatdagi o‘rnini yuqori baholagan, balki prezident poolʼidagi har bir jurnalistni yaqindan tanigan.
“Shu vaqtga qadar jami hisobda 8 ta joyda matbuot kotibi lavozimida faoliyat ko‘rsatganman. Men rahbarlarni ikki xil toifaga bo‘lgan bo‘lar edim. Birinchisi – jurnalistikaning jamiyatdagi o‘rnini tushunadigan rahbar. Ikkinchisi – tushunmaydigan rahbar. Men Islom Karimovni birinchi toifaga kiritaman. Chunki Islom aka nafaqat jurnalistikaning jamiyatdagi o‘rnini, balki prezident poolʼidagi har bir jurnalistning ism-familiyasini bilar edilar. Misol uchun, men 2001—2005-yillarda prezident matbuot kotibi lavozimida ishlagan bo‘lsam, prezident poolʼiga ayol jurnalistlarni olib kirganman. Shunda Islom aka hech qanday eʼtiroz bildirmaganlar.
Bir kuni Islom aka mendan “ro‘yxatga kimlarni yozding”, deb so‘rab qoldilar. Shunda men “Alisherni yozdim”, deb javob berdim. Keyin Islom aka “Hoshimovmi yoki Azimovmi”, deya so‘ragan edilar. O‘shanda Islom Abdug‘aniyevich jurnalistlarni familiyasigacha eslab qolganliklarini bilganman. Hatto rossiyalik jurnalistlarning hammasini tanir edilar. Yaʼni Islom aka o‘quvchi sifatida ham jurnalistlarni kuzatib borar edi”, — deydi sobiq prezident matbuot kotibi.
“Yangi media” taʼlim markazi direktori Beruniy Alimov qo‘shimcha qilishicha, Islom Karimov Andijon voqealaridan keyin tashkil etilgan press-konferensiyaga kutilmaganda tashrif buyurib, jurnalistlarning barcha savollariga ochiq javob bergan.
“2005-yilda yuz bergan Andijon voqealaridan keyin prezident devonida press-konferensiya tashkil qildik. Press-konferensiya yakuniga yetgach, Islom aka “bundan ko‘nglim to‘lmadi, Bosh prokuraturada yana bitta press-konferensiya uyushtiringlar va barcha jurnalistlarni chaqiringlar”, dedilar. Shundan keyin Bosh prokuratura binosida Andijon voqealariga bag‘ishlangan press-konferensiya tashkil qildik. Barcha xorijiy va o‘zimizdagi OAVlarni chaqirdik. Tadbir boshlangach, kutilmaganda zalga Islom Abdug‘aniyevich kirib keldilar-da, kelib mening oldimga o‘tirib, barcha jurnalistlarning savollariga ochiq javob berdilar. Agar Islom aka jurnalistika va OAVning jamiyatda o‘rni yo‘q, deb hisoblaganlarida, bu tadbirga kelmagan bo‘lar edilar. Islom Abdug‘aniyevich jurnalistlar bilan qanday ishlash kerakligini juda yaxshi bilar edi”, — dedi Beruniy Alimov.
Suhbatning to‘liq variantini “Daryo”ning YouTube’dagi sahifasida tomosha qilishingiz mumkin.
Izoh (0)