Yozuvchi Murod Muhammad Do‘st “Lolazor” podkastida O‘zbekistonning birinchi prezidenti Islom Karimov tug‘ilgan kunini qanday nishonlagani to‘g‘risidagi savolga javob berdi.
Yozuvchining aytishicha, marhum tug‘ilgan kunini xorijda va O‘zbekistonda nishonlagan paytlari bo‘lgan.
“Islom Karimovning tug‘ilgan kunini 4 – 5 marta Shveysariyada nishonlaganmiz. Oddiy stol tayyorlanib, dasturxonga ovqatlar tortilardi. Faqatgina “suxoy” vinomidi, Islom akaning ichimligini quyib beradigan odam doim uni qo‘lida ushlab yurardi. Agar biror joyga qo‘ysa ham o‘sha idishdan ko‘z uzmasdi. Bu xavfsizlik nuqtai nazaridan bo‘lsa kerak. Keyin 1-2 marta shu yerda ham nishonlangan. Lekin uyida qanday nishonlaganini bilmayman. Tug‘ilgan kunida kabinetiga kirardik, gulga o‘xshagan narsa olib kirilardi, sovg‘a berilmasdi. Amaldorlar prezidentga sovg‘a berishga qo‘rqardi. Islom aka ham baʼzi paytlar bilsa, boshqalarni ham tug‘ilgan kuni bilan tabriklardi”, — dedi yozuvchi.
Suhbatda Murod Muhammad Do‘st o‘sha davrda Islom Karimovga berilgan to‘yga taklifnoma voqeasini ham esga olgan.
“Islom akada qiziq jihatlar bor edi. Bir kuni bittasi to‘yga taklifnoma olib kiribdi. Sal oldinroq uning qudasi ham taklifnoma olib kelgan ekan. Islom aka ‘Ko‘rmaysanmi bularni, bunisining qo‘lida puli bor, unisida kuchi bor. Ertaga birortasida muammo bo‘lsa, bunisi o‘g‘li yoki qizini qo‘yib yuboradi’, degandi. Lekin ular bir–birini qo‘yib yubormadi. Aksincha, chambarchas bog‘lanib ketishdi. Islom aka kattalarni o‘zaro quda bo‘lishini yomon ko‘rardi. Axir, ular nima maqsadda quda bo‘layotgan tushunarli-ku”, — deydi 1993–1999-yillarda Islom Karimovning matbuot kotibi bo‘lib ishlagan Murod Muhammad Do‘st.
Avvalroq yozuvchi Islom Karimov shaxsiyati, u yo‘l qo‘ygan ulkan xatolardan biri to‘g‘risida xotiralarini aytgandi.
Izoh (0)