O‘zbekistonning yangi elchisi Hindiston prezidentiga ishonch yorliqlarini topshirdi

O‘zbekistonning yangi elchisi Hindiston prezidentiga ishonch yorliqlarini topshirdi, deb xabar bermoqda “Dunyo” axborot agentligi.

Maʼlum qilinishicha, bugun, 27-mart kuni O‘zbekistonning yangi tayinlangan elchisi Sardor Rustamboyev Dehlidagi “Rashtrapati Bhavan” saroyida Hindiston prezidenti Draupadi Murmuga ishonch yorliqlarini topshirdi. Rasmiy marosimdan so‘ng bo‘lib o‘tgan suhbat chog‘ida O‘zbekiston va Hindiston o‘rtasidagi ko‘p tomonlama hamkorlikning bugungi holati va uni yanada rivojlantirish istiqbollari muhokama qilindi.

Oliy va yuqori darajalardagi muntazam uchrashuvlar va muloqotlar ikki davlatning ko‘p qirrali va o‘zaro manfaatli hamkorlikni mustahkamlashdagi kuchli siyosiy irodasi va qatʼiyatini tasdiqlayotgani, strategik sheriklikni sifat jihatidan yangi bosqichga olib chiqish imkoniyatini taqdim etayotgani taʼkidlandi.

Siyosiy, savdo-iqtisodiy va madaniy-gumanitar sohalarda hamkorlikni faollashtirish uchun ulkan salohiyat va o‘zaro intilish mavjudligi qayd etildi. Ikki tomonlama hamkorlikning zamonaviy holati yuqori baholanib, barcha sohalarda o‘zaro manfaatli aloqalar yanada rivojlanishiga ishonch bildirildi.

Hindiston prezidenti O‘zbekiston elchisiga o‘zaro munosabatlarni mustahkamlash yo‘lidagi faoliyatiga muvaffaqiyat tiladi.