2001–2005 йиллар давомида Ўзбекистон биринчи президентининг матбуот котиби лавозимида фаолият кўрсатган, ҳозирда “Янги медиа” таълим маркази директори Беруний Алимов “Дарё” билан суҳбат давомида Ислом Каримовнинг ОАВ ва журналистларга бўлган эътибори ҳақида гапириб ўтди.
Беруний Алимовнинг таъкидлашича, Ўзбекистоннинг биринчи президенти нафақат журналистиканинг жамиятдаги ўрнини юқори баҳолаган, балки президент pool’идаги ҳар бир журналистни яқиндан таниган.
“Шу вақтга қадар жами ҳисобда 8 та жойда матбуот котиби лавозимида фаолият кўрсатганман. Мен раҳбарларни икки хил тоифага бўлган бўлар эдим. Биринчиси – журналистиканинг жамиятдаги ўрнини тушунадиган раҳбар. Иккинчиси – тушунмайдиган раҳбар. Мен Ислом Каримовни биринчи тоифага киритаман. Чунки Ислом ака нафақат журналистиканинг жамиятдаги ўрнини, балки президент поолъидаги ҳар бир журналистнинг исм-фамилиясини билар эдилар. Мисол учун, мен 2001—2005 йилларда президент матбуот котиби лавозимида ишлаган бўлсам, президент pool’ига аёл журналистларни олиб кирганман. Шунда Ислом ака ҳеч қандай эътироз билдирмаганлар.
Бир куни Ислом ака мендан “рўйхатга кимларни ёздинг”, деб сўраб қолдилар. Шунда мен “Алишерни ёздим”, деб жавоб бердим. Кейин Ислом ака “Ҳошимовми ёки Азимовми”, дея сўраган эдилар. Ўшанда Ислом Абдуғаниевич журналистларни фамилиясигача эслаб қолганликларини билганман. Ҳатто россиялик журналистларнинг ҳаммасини танир эдилар. Яъни Ислом ака ўқувчи сифатида ҳам журналистларни кузатиб борар эди”, — дейди собиқ президент матбуот котиби.
“Янги медиа” таълим маркази директори Беруний Алимов қўшимча қилишича, Ислом Каримов Андижон воқеаларидан кейин ташкил этилган пресс-конференцияга кутилмаганда ташриф буюриб, журналистларнинг барча саволларига очиқ жавоб берган.
“2005 йилда юз берган Андижон воқеаларидан кейин президент девонида пресс-конференция ташкил қилдик. Пресс-конференция якунига етгач, Ислом ака “бундан кўнглим тўлмади, Бош прокуратурада яна битта пресс-конференция уюштиринглар ва барча журналистларни чақиринглар”, дедилар. Шундан кейин Бош прокуратура биносида Андижон воқеаларига бағишланган пресс-конференция ташкил қилдик. Барча хорижий ва ўзимиздаги ОАВларни чақирдик. Тадбир бошлангач, кутилмаганда залга Ислом Абдуғаниевич кириб келдилар-да, келиб менинг олдимга ўтириб, барча журналистларнинг саволларига очиқ жавоб бердилар. Агар Ислом ака журналистика ва ОАВнинг жамиятда ўрни йўқ, деб ҳисоблаганларида, бу тадбирга келмаган бўлар эдилар. Ислом Абдуғаниевич журналистлар билан қандай ишлаш кераклигини жуда яхши билар эди”, — деди Беруний Алимов.
Суҳбатнинг тўлиқ вариантини “Дарё”нинг YouTube’даги саҳифасида томоша қилишингиз мумкин.
Изоҳ (0)