Surxondaryo viloyatida gaz tarmog‘iga ulanishga ruxsat berishi uchun tadbirkordan pul talab qilgan bo‘lim boshlig‘i ushlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Termiz shahar bo‘limi, prokuratura va IIB xodimlari hamkorligida tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Unda “Termizshahargaz” gaz taʼminoti bo‘limi boshlig‘i F.H. “M.M.” oilaviy korxonasining umumiy ovqatlanish shoxobchasida gaz nuqtalarini tashkil etish va ularni tarmoqqa ulashga ruxsat hamda texnik shart xulosasini berishi evaziga 700 dollar va loyiha hujjatlarini arzon narxlarda tayyorlab berishi uchun yana 2 million so‘m talab qilib, ushbu pullar hisobidan 5 million so‘mni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkent viloyatida dafn marosimlarini o‘tkazishda xizmat ko‘rsatishga ruxsat berishi evaziga tadbirkordan pul talab qilgan bo‘lim boshlig‘i ushlangani to‘g‘risida xabar berilgandi.
Izoh (0)