Сурхондарё вилоятида газ тармоғига уланишга рухсат бериши учун тадбиркордан пул талаб қилган бўлим бошлиғи ушланди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Термиз шаҳар бўлими, прокуратура ва ИИБ ходимлари ҳамкорлигида тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Унда “Термизшаҳаргаз” газ таъминоти бўлими бошлиғи Ф.Ҳ. “М.М.” оилавий корхонасининг умумий овқатланиш шохобчасида газ нуқталарини ташкил этиш ва уларни тармоққа улашга рухсат ҳамда техник шарт хулосасини бериши эвазига 700 доллар ва лойиҳа ҳужжатларини арзон нархларда тайёрлаб бериши учун яна 2 миллион сўм талаб қилиб, ушбу пуллар ҳисобидан 5 миллион сўмни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкент вилоятида дафн маросимларини ўтказишда хизмат кўрсатишга рухсат бериши эвазига тадбиркордан пул талаб қилган бўлим бошлиғи ушлангани тўғрисида хабар берилганди.
Изоҳ (0)