“G‘ishtko‘prik” chegara bojxona postida yirik miqdorda dori vositalari to‘xtatib qolindi. Bu haqda Toshkent viloyati bojxona boshqarmasi matbuot xizmati xabar berdi.
Qayd etilishicha, Toshkent viloyati bojxona boshqarmasi Shaxsiy xavfsizlik guruhi tezkor vakili hamda Kontrabandaga qarshi kurashish bo‘limi tezkor tuzilmalari tomonidan tezkor tadbir o‘tkazilgan. Tadbirda olingan tezkor maʼlumotga asosan O‘zbekistonga o‘tish uchun “G‘ishtko‘prik” chegara bojxona postiga piyoda holda kirib kelgan fuqaroning qo‘l yuklari bojxona nazoratidan o‘tkazilgan.
Tekshiruv davomida bojxona nazoratiga taqdim qilinmagan, umumiy qiymati 908 million so‘mdan ziyod 3 944 dona har xil nomli dori vositalari, 2 dona konteynerda “Termo-Kont MK” nomli sovituvchi element hamda 12 dona Rich creme nomli soch bo‘yoqlari borligi aniqlangan.
Hozirda holat yuzasidan bojxona organlari tomonidan surishtiruv harakatlari davom etmoqda.
Avvalroq Toshkent viloyatida 110 grammdan ortiq zargarlik buyumlarini chegaradan olib o‘tmoqchi bo‘lgan shaxs to‘xtatib qolingani to‘g‘risida xabar berilgandi.
Izoh (0)