Oliy Majlis Senati O‘zbekiston hududlarini ijtimoiy-iqtisodiy rivojlantirish bo‘yicha qabul qilingan dasturlar ijrosi doirasida qishloq xo‘jaligida suv taʼminoti va suvdan samarali foydalanish bo‘yicha belgilangan vazifalarning ijrosiga ham alohida eʼtibor qaratmoqda. Bu haqda Senat matbuot xizmati xabar berdi.
Maʼlum qilinishicha, 2024-yilning fevral oyida Jizzax viloyatida o‘tkazilgan o‘rganishlar va tahlillar shuni ko‘rsatdiki, suv xo‘jaligini rivojlantirishning 2020–2030-yillarga mo‘ljallangan konsepsiyasida belgilangan vazifalar ijrosi bo‘yicha salmoqli ishlar amalga oshirilgan.
O‘rganish va tahlillar, fermer xo‘jaliklari bilan o‘tkazilgan muloqotlar jarayonida suvdan samarali foydalanish, shu jumladan suv tejovchi texnologiyalarni joriy etish bo‘yicha belgilangan vazifalar ijrosini taʼminlashda hal etilishi lozim bo‘lgan ayrim masalalar mavjudligi maʼlum bo‘ldi.
Yuqoridagilardan kelib chiqib, Senatning Agrar va suv xo‘jaligi masalalari qo‘mitasi raisi o‘rinbosari Risqul Siddiqov suv xo‘jaligi vaziriga senator so‘rovi yubordi.
So‘rovda qishloq xo‘jaligi ekinlarni sug‘orishda 35 yil avvalgi gidromodul rayonlashtirish normalari qo‘llanilayotgani, ayrim holatlarda suv tejovchi texnologiyalarni joriy etishda hududning tuproq va iqlim sharoiti chuqur o‘rganilmaganligi oqibatida o‘rnatilgan har xil turdagi suv tejovchi texnologiyalar yer maydoniga mos kelmasligi va samaradorligi past ekani keltirib o‘tilgan.
So‘rovda qayd etilishicha, suv tejovchi texnologiyalarni o‘rnatish uchun kredit mablag‘larini ajratish shartlari murakkab, ularni bajarish uchun ayrim fermer xo‘jaliklarining bugungi iqtisodiy holati talabga javob bermaydi. Hududlarda yangi zamonaviy texnologiyalardan samarali foydalanish bo‘yicha fermerlar va mutaxassislarning malakasi yetarli emas.
Shuningdek, prezidentning 2020-yil 11-avgustdagi qarori bilan tasdiqlangan manzilli ro‘yxatga muvofiq viloyatda 2021–2023-yillarda 14 ta irrigatsiya obyektini qurish va rekonstruksiya qilish uchun ko‘zda tutilgan mablag‘lar o‘z vaqtida yo‘naltirilmaganligi sababli tadbirlar ijrosi yildan yilga o‘tkazilib, kechiktirilmoqda.
Senator vazirdan 2024-yilda suvni tejaydigan sug‘orish texnologiyalarini keng joriy qilish, yerlarning meliorativ holatini yaxshilash hamda ilm-fan yangiliklarini ishlab chiqarishga keng joriy etish, yangi gidromodul rayonlashtirish normalarini ishlab chiqish, hududning tuproq va iqlim sharoitiga mos bo‘lgan suv tejovchi texnologiyalarni joriy etish yuzasidan tushuntirish berishni so‘radi.
Shu bilan bir qatorda, suv tejovchi texnologiyalar va sug‘orish obyektlariga qurilmalarni o‘rnatish bo‘yicha kadrlar tayyorlash va xorijiy tajribalarni o‘rganish, suv nasoslarini modernizatsiya qilish va ularni boshqarishni xususiy sheriklikka berish borasida vazirlik tomonidan amalga oshiriladigan ishlar hamda suv taqchilligining oldini olish va suv tejovchi texnologiyalarni keng joriy qilishga oid tegishli takliflar taqdim etishni so‘radi.
Izoh (0)