Namanganda ichimlik suvi narxi aholi uchun 40 foiz, yuridik shaxslarga 2 baravardan ko‘pga qimmatladi

Namanganda isteʼmolchilar uchun ichimlik suvi narxlari oshirildi. Bu haqda xalq deputatlari viloyat kengashining tegishli qarori qabul qilingan, deya xabar beradi “Daryo” muxbiri Azizbek Abduvaliyev.

Qaror ilovasida viloyatda aholining ichimlik suvi bilan taʼminlanganlik darajasi yil davomida 79,6 foizdan 82,7 foizga yetgani, 330 mingga yaqin kishi ilk bor ichimlik suvi bilan taʼminlangan, 2024-yilda 160 milliard so‘m evaziga 320 kilometr tarmoq tortish hamda 11 ta inshoot qurish va rekonstruksiya qilish rejalashtirilgani qayd etilgan.

Ushbu qaror bilan ichimlik suvi narxi aholi uchun bir kubometri 3500 so‘m, korxona va tashkilotlar uchun esa 7 ming so‘m etib tasdiqlangan.

Hozirgacha viloyatda ichimlik suvi uchun aholi 2550 so‘m, korxona-tashkilotlar esa 3315 so‘m to‘lab kelayotgan edi.

Narx qimmatlashuvi yoqilg‘i-energetika resurslari, jumladan, elektr energiyasi tariflari oshishi hamda viloyatda ichimlik suvi yetkazib berishning katta xarajatlar talab etuvchi jihatlari bilan izohlangan.

Yangi tariflar 2024-yil 22-martdan kuchga kirishi belgilangan.