Moskva viloyatidagi Crocus City Hall dagi terakt ishi bo‘yicha to‘rt nafar gumonlanuvchi ikki oyga hibsga olindi va uyushgan guruh tarkibida terakt sodir etishda ayblandi.
Moskvaning Basmanniy sudi ayblanuvchilar o‘z aybini to‘liq tan olganlarini ma’lum qildi. To‘rt nafar ayblanuvchi kaltaklanish belgilari bilan, jumladan, qulog‘i kesilgan, boshi bog‘langan holda va nogironlar aravachasida sudga olib kelingan.
Sud majlisi yopiq eshiklar ortida o‘tgan. Sud Fayzov va Fariduni o‘z aybiga iqror bo‘lgan yoki yo‘qligiga aniqlik kiritmagan. Faqat ikki kishi aybiga iqror bo‘lgani ma’lum, bular: Dalerjon Mirzoyev va Saidakrami.
Fayzov, boshqa hibsga olingan sudlanuvchilar singari, uyushgan guruh tarkibida odam o‘limiga olib kelgan teraktda ayblanmoqda (Rossiya Jinoyat kodeksining 205-moddasi 3-qismi “b” bandi). Tergov maʼlumotlariga ko‘ra, u konsert majmuasiga uyushtirilgan hujumni videoga olgan.
Ayblanuvchi haqida nimalar ma’lum bo‘ldi:
Dalerjon Mirzoyev — 32 yosh, Tojikiston fuqarosi, oilali, to‘rt nafar voyaga etmagan farzandi bor. Novosibirskda uch oylik ro‘yxatdan o‘tgan, lekin muddati tugagan. Rossiyada rasmiy ravishda ishlamaydi. Aybini tan olgan.
Saidakrami Rachabalizoda – 1994-yilda tug‘ilgan (30 yosh), Tojikiston fuqarosi, oilali, farzandi bor. Ro‘yxatdan o‘tgan, lekin qayerda ekanini eslay olmadi. Aybini tan olgan.
Shamsidin Fariduni — 1998-yilda tug‘ilgan (25 yosh), Tojikiston fuqarosi, oilali, sakkiz oylik farzandi bor. Krasnogorskda ro‘yxatdan o‘tgan, zavodda ishchi sifatida ishlagan.
Muhammadsobir Fayzov — 2004-yilda tug‘ilgan (19 yosh), Tojikiston fuqarosi, uylanmagan, farzandi yo‘q. Ivanovoda ro‘yxatdan o‘tgan va ilgari sartarosh bo‘lib ishlagan.
Ayblanuvchilar 500 ming rubl olishi kerak edi
“Izvestiya”ning xabardor manbasiga ko‘ra, hujumni sodir etganlikda ayblanayotganlar umumiy 500 ming rubl olishi kerak edi. Mablag‘ning yarmi — 250 ming rubl — ularning bank kartasiga o‘tkazilgan.
Bundan tashqari, ikki ayblanuvchi Turkiyada bo‘lganida ko‘rsatma olgan, qolgan ikki nafari allaqachon Rossiya hududida bo‘lgan.
Crocus’dagi terakt: nimalar ma’lum?
Crocus City Hall’dagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 133 kishi halok bo‘ldi, 182 kishi yaralandi.
23-mart kuni Moskva viloyatidagi Crocus City Hall’da sodir etilgan terakt yuzasidan 11 kishi qo‘lga olindi. OAVda hibsga olinganlar orasida Tojikiston fuqarolari ham borligi haqida maʼlumotlar paydo bo‘ldi. Tojikiston Tashqi ishlar vazirligi Rossiya rasmiylaridan mamlakat fuqarolarining teraktga aloqadorligi haqida maʼlumot olmaganini maʼlum qildi. Mamlakatning Rossiyadagi elchixonasi vatandoshlarini ommaviy tadbirlarda qatnashmaslikka chaqirdi.
Gumonlanuvchilar qo‘lga olingan kuni bir qator Telegram kanallarida Tojikistonning to‘rt fuqarosi teraktda ishtirok etgan bo‘lishi mumkinligi haqida xabar tarqalib, ularning surati e’lon qilindi. Jumladan, Rivojiddin Islomov va Maxmadrasul Nasriddinovlarning ism-shariflari va fotosuratlari chop etildi.
Keyinroq Tojikiston Ichki ishlar vazirligi Telegram kanallaridagi maʼlumotni rad etib, ushbu respublika fuqarolari 2023-yil 26-noyabr kuni Rossiyadan qaytib kelgani, terakt sodir bo‘lgan vaqtda Tojikistonda yashash joyida bo‘lganini maʼlum qildi. Respublika Ichki ishlar vazirligi ham ularning pasportlar bilan tushgan suratlarini chop etdi.
Putin Tojikiston prezidenti bilan gaplashdi
Rossiya prezidenti Vladimir Putin 24-mart kuni tojikistonlik hamkasbi Emomali Rahmon bilan teraktni muhokama qildi. Tojikiston prezidenti telefon suhbatida Moskva viloyatidagi teraktni qoraladi. Tojikiston va Rossiya terrorizmga qarshi birgalikda kurashni davom ettirish niyatini tasdiqladi. Emomali Rahmon “terrorchilarning millati, vatani, dini yo‘qligini” ta’kidlagan.
Teraktdan so‘ng migrantlarga munosabat o‘zgardi
Rossiya viloyatlarida Crocus City Hall’dagi teraktdan so‘ng muhojirlarga nisbatan yangi diskriminatsiya holatlari kuzatilmoqda. Aeroportda qirg‘izistonliklar ushlab turilgani, haydovchilarning millati surishtirilayotgani va ish beruvchilardan migrantlar haqida ma’lumot taqdim etish talab qilinayotgani aytilmoqda.
Buning fonida Qrimdan davlat dumasi deputati Mixail Sheremet muhojirlarning Rossiyaga kirishini urush davomida cheklashni taklif qilgan. U Rossiyaga yaxshi niyat bilan keladigan xorijliklarni hurmat qilishi, afsuski, ularning ayrimlari “ko‘r-ko‘rona rus xalqiga zarar yetkazish” uchun foydalanilayotganini ta’kidlagan.
Izoh (0)