Москва вилоятидаги Crocus City Hall’даги теракт иши бўйича тўрт нафар гумонланувчи икки ойга ҳибсга олинди ва уюшган гуруҳ таркибида теракт содир этишда айбланди.
Москванинг Басманний суди айбланувчилар ўз айбини тўлиқ тан олганларини маълум қилди. Тўрт нафар айбланувчи калтакланиш белгилари билан, жумладан, қулоғи кесилган, боши боғланган ҳолда ва ногиронлар аравачасида судга олиб келинган.
Суд мажлиси ёпиқ эшиклар ортида ўтган. Суд Файзов ва Фаридуни ўз айбига иқрор бўлган ёки йўқлигига аниқлик киритмаган. Фақат икки киши айбига иқрор бўлгани маълум, булар: Далержон Мирзоев ва Саидакрами.
Файзов, бошқа ҳибсга олинган судланувчилар сингари, уюшган гуруҳ таркибида одам ўлимига олиб келган терактда айбланмоқда (Россия Жиноят кодексининг 205-моддаси 3-қисми “б” банди). Тергов маълумотларига кўра, у концерт мажмуасига уюштирилган ҳужумни видеога олган.
Айбланувчи ҳақида нималар маълум бўлди:
Далержон Мирзоев — 32 ёш, Тожикистон фуқароси, оилали, тўрт нафар вояга этмаган фарзанди бор. Новосибирскда уч ойлик рўйхатдан ўтган, лекин муддати тугаган. Россияда расмий равишда ишламайди. Айбини тан олган.
Саидакрами Рачабализода – 1994 йилда туғилган (30 ёш), Тожикистон фуқароси, оилали, фарзанди бор. Рўйхатдан ўтган, лекин қаерда эканини эслай олмади. Айбини тан олган.
Шамсидин Фаридуни — 1998 йилда туғилган (25 ёш), Тожикистон фуқароси, оилали, саккиз ойлик фарзанди бор. Красногорскда рўйхатдан ўтган, заводда ишчи сифатида ишлаган.
Муҳаммадсобир Файзов — 2004 йилда туғилган (19 ёш), Тожикистон фуқароси, уйланмаган, фарзанди йўқ. Ивановода рўйхатдан ўтган ва илгари сартарош бўлиб ишлаган.
Айбланувчилар 500 минг рубль олиши керак эди
“Известия”нинг хабардор манбасига кўра, ҳужумни содир этганликда айбланаётганлар умумий 500 минг рубль олиши керак эди. Маблағнинг ярми — 250 минг рубль — уларнинг банк картасига ўтказилган.
Бундан ташқари, икки айбланувчи Туркияда бўлганида кўрсатма олган, қолган икки нафари аллақачон Россия ҳудудида бўлган.
Crocus’даги теракт: нималар маълум?
Crocus City Hall’даги теракт 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 133 киши ҳалок бўлди, 182 киши яраланди.
23 март куни Москва вилоятидаги Crocus City Hall’да содир этилган теракт юзасидан 11 киши қўлга олинди. ОАВда ҳибсга олинганлар орасида Тожикистон фуқаролари ҳам борлиги ҳақида маълумотлар пайдо бўлди. Тожикистон Ташқи ишлар вазирлиги Россия расмийларидан мамлакат фуқароларининг терактга алоқадорлиги ҳақида маълумот олмаганини маълум қилди. Мамлакатнинг Россиядаги элчихонаси ватандошларини оммавий тадбирларда қатнашмасликка чақирди.
Гумонланувчилар қўлга олинган куни бир қатор Telegram каналларида Тожикистоннинг тўрт фуқароси терактда иштирок этган бўлиши мумкинлиги ҳақида хабар тарқалиб, уларнинг сурати эълон қилинди. Жумладан, Ривожиддин Исломов ва Махмадрасул Насриддиновларнинг исм-шарифлари ва фотосуратлари чоп этилди.
Кейинроқ Тожикистон Ички ишлар вазирлиги Telegram каналларидаги маълумотни рад этиб, ушбу республика фуқаролари 2023 йил 26 ноябрь куни Россиядан қайтиб келгани, теракт содир бўлган вақтда Тожикистонда яшаш жойида бўлганини маълум қилди. Республика Ички ишлар вазирлиги ҳам уларнинг паспортлар билан тушган суратларини чоп этди.
Путин Тожикистон президенти билан гаплашди
Россия президенти Владимир Путин 24 март куни тожикистонлик ҳамкасби Эмомали Раҳмон билан терактни муҳокама қилди. Тожикистон президенти телефон суҳбатида Москва вилоятидаги терактни қоралади. Тожикистон ва Россия терроризмга қарши биргаликда курашни давом эттириш ниятини тасдиқлади. Эмомали Раҳмон “террорчиларнинг миллати, ватани, дини йўқлигини” таъкидлаган.
Терактдан сўнг мигрантларга муносабат ўзгарди
Россия вилоятларида Crocus City Hall’даги терактдан сўнг муҳожирларга нисбатан янги дискриминация ҳолатлари кузатилмоқда. Аэропортда қирғизистонликлар ушлаб турилгани, ҳайдовчиларнинг миллати суриштирилаётгани ва иш берувчилардан мигрантлар ҳақида маълумот тақдим этиш талаб қилинаётгани айтилмоқда.
Бунинг фонида Қримдан давлат думаси депутати Михаил Шеремет муҳожирларнинг Россияга киришини уруш давомида чеклашни таклиф қилган. У Россияга яхши ният билан келадиган хорижликларни ҳурмат қилиши, афсуски, уларнинг айримлари “кўр-кўрона рус халқига зарар етказиш” учун фойдаланилаётганини таъкидлаган.
Изоҳ (0)