Rossiya prezidenti Vladimir Putin rus hukumati mamlakatning Ukraina bilan chegaradosh hududlari aholisi xavfsizligini taʼminlash borasida ish olib borayotganini maʼlum qildi. Bu haqda “TASS” nashri xabar berdi.
“Birinchi maqsadimiz — xavfsizlikni taʼminlash. Buni amalga oshirishning bir qancha yo‘llari bor, ularni amalga oshirish oson emas, lekin biz buni bajaramiz”, — degan Vladimir Putin.
Prezident Belgorod viloyati, shuningdek, Ukraina bilan chegaradosh boshqa viloyatlar aholiga hujumlar paytida ko‘rsatgan jasorat uchun minnatdorlik bildirgan. Barcha hujumga uchragan chegara viloyatlari aholisi davlat yordamini olishiga vaʼda bergan.
Rossiya yetakchisi maʼlum qilishicha, Rossiyaning mudofaa borasida o‘z rejalari va qarashlari bor. Mamlakat dushman qo‘llagan hujum usullarini uning o‘ziga qarshi ishlatishi ham mumkin.
“Dushman tinch aholi uylari va harbiy bo‘lmagan obyektlarga hujum qilmoqda. Biz ham ,albatta, ularga ham xuddi shunday javob berib, ularning fuqarolik infratuzilmasi va boshqa shunga o‘xshash obyektlariga zarba berishimiz mumkin”, — degan Rossiya yetakchisi.
Vladimir Putin chegara viloyatlarida xavfsizlik choralari kuchaytirilishi va tinch aholi osoyishtaligi taʼminlanishi borasida ish olib borilayotganini maʼlum qilgan.
Izoh (0)