АҚШ собиқ президенти Дональд Трампнинг адвокатлари унинг фирибгарлик иши бўйича суд томонидан қўйилган жаримани қоплаш учун 550 миллион доллардан ортиқ гаров пулини тўлай олмаслигини айтди, дея Euronews хабар берди.
Тегишли баёнот 18 март куни Нью-Йорк судида қабул қилинган. Унда айтилишича, жаримани тўлашнинг ҳозирда иложи йўқ. Трамп жарима ҳақидаги қарор устидан шикоят қилмоқчи. Аммо суд апелляцияни кўриб чиқиши учун Трамп ушбу жариманинг 120 фоизи ва кунига 112 000 доллар миқдорида жарима тўлаши лозим.
Ўтган йили Трамп 400 миллион доллардан ортиқ нақд пули борлигини даъво қилган эди. Собиқ раҳбарнинг адвокатлари 30 та андеррайтинг фирмасининг (фоизли кредит берувчи компаниялар) рад жавобига ишора қилиб, гаров миқдорини ярим миллиард доллардан 100 миллион долларгача камайтиришни сўраган.
Трампларга қарши фирибгарлик иши
Шу йилнинг февраль ойида Нью-Йорк судьяси Артур Энгорон прокурор Летитиа Жеймснинг Трамп ва унинг ўғиллари кичик Дональд ва Эрик Трампга қарши даъвосини қаноатлантирган эди.
Тергов улар узоқ йиллар давомида банклар ва суғуртачиларни алдаб келишганини исботлаган. Трамплар молиявий ҳисоботларда ўз бойликларини сезиларли даражада ошириб кўрсатган ва шу тариқа кредитлар олиб, ўзлари учун қулайроқ шартларда битимлар тузган.
Суд Дональд Трампга 355 миллион доллар жарима солган. Шунингдек, унга уч йил давомида Нью-Йорк корпорациялари ва корхоналарида лавозимларни эгаллаш ва штатдаги ҳар қандай молия институтидан кредит олиш учун ариза топшириш тақиқланган. Ўғиллари тўрт миллион доллар жаримага тортилган.
Мулкни мусодара қилиш истиқболлари
Демократик партия аъзоси Летитиа Жеймс, агар Трамп керакли миқдорда маблағ киритмаса, у активларининг бир қисмини тортиб олишга ҳаракат қилишини айтган. Адвокатларнинг хабар беришича, апелляцияни кўриб чиқиш учун талаб қилинадиган гаров миқдори аллақачон 557,5 миллион долларни ташкил этади.
Трамп миллиард доллар бойликка эга эканлигини даъво қилишига қарамай, унинг активлари осмонўпар бинолар, голф майдонлари ва бошқа кўчмас мулклардир.
Андеррайтерлар гаров сифатида нақд пул ва қимматли қоғозларни афзал кўришади, — дея қўшимча қилган адвокатлар.
Изоҳ (0)