“AQSHni amaldagi prezident boshqarmaydi” — Tramp

AQSH sobiq prezidenti Donald Tramp mamlakatni amaldagi prezident Jo Bayden emas, uning “atrofidagi aqlli va yovuz odamlar” boshqarishini ma’lum qildi. Bu haqda “RIA Novosti” xabar berdi.

“U AQSHni boshqaradimi, degan savol tug‘iladi, chunki u doim yo‘qday ko‘rinadi. Mamlakatni boshqarishiga ishonchim komil emas. Bilaman, u qarorlarni ma’qullashi kerak, nimadir qilishdan oldin unga murojaat qilishadi, u esa ma’nosiz nigoh bilan rozi bo‘ladi”, — dedi u.

Tramp AQSHni Bayden atrofidagi “aqlli va yovuz odamlar” boshqarishi, amaldagi prezidentning o‘zi esa imkon qadar “tezroq uyquga ketishni xohlashi”ni aytdi. Bungacha Tramp amaldagi prezident yuritayotgan siyosat tufayli “AQSH Xitoyning qo‘g‘irchog‘iga aylangani”ni aytgandi.

Uning so‘zlariga ko‘ra, Oq uyning harakatlari “AQSH iqtisodini vayron qildi” va muhojirlarning bostirib kirishiga va inflyatsiyaning oshishiga sabab bo‘ldi. AQSHning sobiq prezidenti hamma narsani qaytarishning eng oson yo‘lini uni (Trampni) prezident etib saylash ekanini aytgan.