Президент Марказий сайлов комиссияси раиси Зайниддин Низомхўжаевни “Ўзбекистон Республикасида хизмат кўрсатган ёшлар мураббийси” фахрий унвони билан тақдирлади.
Президент фармонига мувофиқ у давлат ҳокимияти вакиллик органлари ҳамда мамлакат соғлиқни сақлаш тизимидаги кўп йиллик самарали меҳнати, юртимизда миллий сайлов тизимини умумеътироф этилган халқаро стандартлар асосида такомиллаштириш, демократик ислоҳотларни муваффақиятли амалга ошириш, фуқароларнинг конституциявий ҳуқуқларини рўёбга чиқариш борасидаги катта хизматлари, юксак салоҳиятли кадрларни тайёрлаш, ёш авлодни она ватанга муҳаббат ва садоқат руҳида тарбиялашга қўшган муносиб ҳиссаси, шунингдек, таваллудининг 70 йиллиги муносабати билан ушбу унвон билан тақдирланди.
19 март куни Шавкат Мирзиёев Зайниддин Низомхўжаевга ушбу юксак унвон ва кўкрак нишонини топширди.
Тиббиёт фанлари доктори, профессор Зайниддин Низомхўжаев узоқ йиллар қатор масъул лавозимларда фидокорона меҳнат қилган. У 2014 йилда Ўзбекистон Қаҳрамони унвони билан мукофотланган.
Зайниддин Низомхўжаев 2021 йилнинг февралидан буён Марказий сайлов комиссияси раиси лавозимида ишлаб келмоқда.
Изоҳ (0)