Фарғонада “Агробанк” ходимлари омонатчилардан бирининг пулларини ўзлаштириб юборгани ҳақида хабарлар тарқалди. Ижтимоий тармоқларда тарқалган хабарлар юзасидан банк матбуот хизмати изоҳ берди.
Маълум қилинишича, банкнинг ички аудит хизмати томонидан Фарғона филиалида ўтказилган аудит текширувлари давомида филиал бошқарувчиси лавозимида ишлаб келган Х.О. ва бошқалар томонидан банкка 600 миллион сўм пул топширган омонатчининг ушбу пулларини 2023 йил март ойида бошқа мақсадларда чиқим қилиб, омонатчининг пластик картасига ўзларининг пулларидан банк орқали ойма-ой пул ўтказиб келгани, ўзларига ишониб топширилган пулларни ўзлаштириб юборгани аниқланган.
Шунингдек, ички аудит хизмати томонидан ўтказилган текширувда банкнинг собиқ масъул филиал ходимлари томонидан Fergana-Оseana масъулияти чекланган жамият қўшма корхонасининг 1,5 миллиард сўми қалбаки ҳужжатлар асосида ўзлаштириб юборгани ҳам маълум бўлган.
Бундан ташқари, текширув давомида банкнинг собиқ мансабдор шахслари томонидан кунлик касса ҳужжатлари маълумотларини сохталаштириш йўли билан 1,8 миллиард сўмни ўзлаштирилгани фош этилган.
Тегишли ҳужжатлар асосида банкнинг Фарғона филиали собиқ мансабдор шахсларига жиноят иши қўзғатилган ва айбдорларга 2023 йилнинг декабрида Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми “а, г” банди ва бошқа моддалари билан тегишли жазолар тайинланган ва етказилган зарарлар айбдорлардан ундирилган.
Изоҳ (0)