Farg‘ona viloyati Quvasoy shahrida 23 yoshli bank xodimi qariyb 50 kishining nafaqa pulini o‘zlashtirgani aniqlandi. Bu haqda “Bu Kun” dasturida xabar berildi.
Unga ko‘ra, 23 yoshli yigit shahardagi banklarning birida g‘aznachi sifatida ishlab kelgan. U 4 yil davomida ushbu lavozimda faoliyat yuritib kelgan. Uning so‘zlariga ko‘ra, nafaqalarni tezroq topshirish bo‘yicha topshiriq olgani sababli shaxsiy mashinasida tarqatishiga to‘g‘ri kelgan. Dastlab 15-20 million so‘m o‘zlashtirgan bo‘lsa, bugungi kunda 40 million so‘mga yetgan. U 48 nafar fuqaroning jami 40 mln dan ortiq yoshga doir nafaqa pullari va bolalar pullarini o‘zlashtirgan.
“Mashinada yetishmovchilik bo‘lar edi. 2 ta Damas bor edi. O‘zimizning shaxsiy mashinalarda yurib tarqatganimizda kassa hisoblanganda 15-20 mln ga yaqin kamomad aniqlandi. Keyin uni to‘g‘irlash uchun bazadan urib, to‘g‘rilab, kassaga chiqarganmiz. Aslida, shaxsiy avtomobilda nafaqa tarqatish mumkin emas, tezroq tarqatish topshirig‘ini olganimiz uchun shaxsiy mashinada chiqqanmiz. ‘Shapka’ qilib yurganimiz uchun pullar ko‘payib ketdi, boshida 15-20 million edi, keyin 40 million so‘m bo‘lib ketdi”, — deydi u.
Mazkur holat yuzasidan Quvasoy shahar IIB huzuridagi tergov bo‘linmasi tomonidan Jinoyat kodeksining 167-moddasi 2-qismi “g” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)