Davlat xavfsizlik xizmatining tezkor tadbirida qalbaki xorijiy valyutalarni muomalaga chiqarishga uringan shaxslar ushlandi.
Xususan, Namangan—Toshkent yo‘nalishida harakatlanayotgan, Toshkent viloyatining Chinoz tumanida yashovchi, 46 yoshli shaxs boshqaruvidagi Honda rusumli avtomashina Pop tumani hududida to‘xtatilib, ko‘zdan kechirilganda, unda qalbaki 4 ming dollar borligi maʼlum bo‘lgan.
Tergovga qadar tekshiruv davomida, u mazkur qalbaki valyutalarni kelgusida sotish maqsadida Yangiqo‘rg‘on tumanida yashovchi, muqaddam sudlangan 53 yoshli fuqarodan 2,2 ming dollarga sotib olgani aniqlangan.
So‘ngra tezkor tadbir davom ettirilib, Yangiqo‘rg‘on tumanida yashovchi fuqaro qalbaki 5,4 ming dollarni haqiqiy 3 ming dollarga ayirboshlagan vaqtida ushlangan.
Aniqlanishicha, u qalbaki valyutalarni Qirg‘izistondagi jinoiy sheriklaridan olib kelgan. O‘tkazilgan tezkor tadbir natijasida jami qalbaki 9,4 ming dollar ashyoviy dalil sifatida olingan.
Bundan oldin Navoiy viloyati IIB TQX Jinoyat qidiruv bo‘limi, DXX Navoiy viloyati boshqarmasi va departament xodimlari bilan hamkorlikda o‘tkazilgan tezkor tadbirda jinoiy guruh tomonidan 400 million so‘m soxta pullar 160 million so‘m haqiqiy pullarga almashtirilayotgan paytda qo‘lga olingandi. Aprel boshlarida esa Toshkent shahri Yangihayot tumanida xaridor qalbaki pulga iPhone sotib olgani, Toshkent viloyati Angren shahrida qalbaki pullar muomalaga kiritilishining oldi olingani to‘g‘risida xabar berilgandi.
Izoh (0)