ДХХ Наманганда қалбаки 9,4 минг долларнинг муомалага чиқарилишига чек қўйди (видео)

Давлат хавфсизлик хизматининг тезкор тадбирида қалбаки хорижий валюталарни муомалага чиқаришга уринган шахслар ушланди.

Хусусан, Наманган—Тошкент йўналишида ҳаракатланаётган, Тошкент вилоятининг Чиноз туманида яшовчи, 46 ёшли шахс бошқарувидаги Honda русумли автомашина Поп тумани ҳудудида тўхтатилиб, кўздан кечирилганда, унда қалбаки 4 минг доллар борлиги маълум бўлган.

Терговга қадар текширув давомида, у мазкур қалбаки валюталарни келгусида сотиш мақсадида Янгиқўрғон туманида яшовчи, муқаддам судланган 53 ёшли фуқародан 2,2 минг долларга сотиб олгани аниқланган.

Сўнгра тезкор тадбир давом эттирилиб, Янгиқўрғон туманида яшовчи фуқаро қалбаки 5,4 минг долларни ҳақиқий 3 минг долларга айирбошлаган вақтида ушланган.

Аниқланишича, у қалбаки валюталарни Қирғизистондаги жиноий шерикларидан олиб келган. Ўтказилган тезкор тадбир натижасида жами қалбаки 9,4 минг доллар ашёвий далил сифатида олинган.

Бундан олдин Навоий вилояти ИИБ ТҚХ Жиноят қидирув бўлими, ДХХ Навоий вилояти бошқармаси ва департамент ходимлари билан ҳамкорликда ўтказилган тезкор тадбирда жиноий гуруҳ томонидан 400 миллион сўм сохта пуллар 160 миллион сўм ҳақиқий пулларга алмаштирилаётган пайтда қўлга олинганди. Апрель бошларида эса Тошкент шаҳри Янгиҳаёт туманида харидор қалбаки пулга iPhone сотиб олгани, Тошкент вилояти Ангрен шаҳрида қалбаки пуллар муомалага киритилишининг олди олингани тўғрисида хабар берилганди.