Birlashgan Millatlar Tashkilotining Falastinlik qochqinlar bo‘yicha agentligi bosh komissari Filipp Lazzarini o‘zining X ijtimoiy tarmog‘idagi sahifasida G‘azoda urushni zudlik bilan to‘xtatishga chaqirdi.
Lazzarini G‘azoda harbiy mojarolar davomida to‘rt yil ichida dunyodagi barcha urushlardagidan ko‘proq bolalar halok bo‘lganini ma’lum qilgan. G‘azoda sodir bo‘layotgan voqealarni “bolalar, ularning bolaligi va kelajagiga qarshi urush” deb atagan. U o‘z xabarini BMT va Falastin Sog‘liqni saqlash vazirligi hisob-kitoblari asosida tuzilgan grafik bilan birga taqdim etgan. Grafikka ko‘ra, Isroil harbiy amaliyoti boshlangan 7-oktyabrdan 29-fevralgacha anklavda 12 300 dan ortiq bola halok bo‘lgan.
2019-yildan 2022-yilgacha dunyo bo‘ylab 12 193 bola harbiy harakatlar qurboni bo‘lgan. Lazzarini sektorda zudlik bilan o‘t ochishni to‘xtatishga chaqirgan.
BMT uzoq vaqtdan beri G‘azoga ocharchilik allaqachon yetib borgani va falastinliklarning hayotiga zomin bo‘layotgani, gumanitar yordam hajmi kamligi, yetkazish esa nihoyatda qiyin ekanligi haqida bong urmoqda.
Isroil o‘z tarixida ilk marta G‘azoda genotsidda ayblanmoqda. Gaagadagi Xalqaro sud yanvar oyida Isroil genotsidining oldini olish hamda falastinliklarga gumanitar yordam yetkazib berishni tashkillashtirish choralarini ko‘rish bo‘yicha vaqtinchalik qaror chiqargan edi.
Izoh (0)