Бирлашган Миллатлар Ташкилотининг Фаластинлик қочқинлар бўйича агентлиги бош комиссари Филипп Лаззарини ўзининг Х ижтимоий тармоғидаги саҳифасида Ғазода урушни зудлик билан тўхтатишга чақирди.
Лаззарини Ғазода ҳарбий можаролар давомида тўрт йил ичида дунёдаги барча урушлардагидан кўпроқ болалар ҳалок бўлганини маълум қилган. Ғазода содир бўлаётган воқеаларни “болалар, уларнинг болалиги ва келажагига қарши уруш” деб атаган. У ўз хабарини БМТ ва Фаластин Соғлиқни сақлаш вазирлиги ҳисоб-китоблари асосида тузилган график билан бирга тақдим этган. Графикка кўра, Исроил ҳарбий амалиёти бошланган 7 октябрдан 29 февралгача анклавда 12 300 дан ортиқ бола ҳалок бўлган.
2019 йилдан 2022 йилгача дунё бўйлаб 12 193 бола ҳарбий ҳаракатлар қурбони бўлган. Лаззарини секторда зудлик билан ўт очишни тўхтатишга чақирган.
БМТ узоқ вақтдан бери Ғазога очарчилик аллақачон етиб боргани ва фаластинликларнинг ҳаётига зомин бўлаётгани, гуманитар ёрдам ҳажми камлиги, етказиш эса ниҳоятда қийин эканлиги ҳақида бонг урмоқда.
Исроил ўз тарихида илк марта Ғазода геноцидда айбланмоқда. Гаагадаги Халқаро суд январь ойида Исроил геноцидининг олдини олиш ҳамда фаластинликларга гуманитар ёрдам етказиб беришни ташкиллаштириш чораларини кўриш бўйича вақтинчалик қарор чиқарган эди.
Изоҳ (0)