Londondagi Kromvel kasalxonasi shifokorlari Apple Vision Pro yordamida orqa miya jarrohlik amaliyotini o‘tkazdi. Bu haqda Business Insider xabar berdi.
Hamshiralardan biri protsedura uchun Apple tomonidan ishlab chiqarilgan ko‘zoynakdan foydalangan. Ularning yordami bilan u operatsiyaga tayyorgarlik ko‘rdi, jarrohlarning ishini kuzatib bordi va tezda kerakli asboblar bilan ularni ta’minladi. Nashrning aniqlik kiritishicha, ilgari shifoxona xodimi xuddi shu maqsadlarda HoloLens 2 garniturasidan foydalangan.
Apple Vision Pro’ning tibbiy maqsadlarda ishlatish uchun mo‘ljallangan dasturi eXeX startapi tomonidan yaratilgan. Uning ilovasi hamshiralarga operatsiya xonasida jarrohlik asbob-uskunalarini tanlash va protsessual qo‘llanmalarga gologramma orqali kontaktsiz kirish imkonini beradi.
Bundan tashqari, dasturiy ta’minot operatsiya qanchalik muvaffaqiyatli bo‘lganini va uning har bir bosqichini darhol baholashga imkon beradi. London mustaqil kasalxonasining yetakchi hamshirasi Suvi Verxoning so‘zlariga ko‘ra, Apple Vision Pro qurilmasi “inson omili” tufayli xatolik ehtimolini sezilarli darajada kamaytiradi va shifokorlarga ishonch bag‘ishlaydi.
Izoh (0)