Тошкент шаҳар, Миробод туманида яшовчи 29 ёшли Н.Ш. ИИОга мурожаат қилиб, банк картасидан 61,5 млн сўм пул маблағлари номаълум шахс томонидан ўзлаштирилганлигини маълум қилган. Бу ҳақда Киберхавфсизлик маркази хабар берди.
Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, судланиб, Зангиота тумани ИИБ Пробация бўлимида ҳисобда туриб, АТИ тариқасидаги жазо муддатини ўтаётган 46 ёшли А.А. ҳамда Тошкент шаҳри, Шайхонтоҳур туманида яшовчи 33 ёшли Э.А.лар содир этганлиги аниқланган.
Унга кўра, А.А. ва Э.А.лар жабрланувчи Н.Ш. билан Telegram орқали танишиб, унга SMS (сохта ҳавола) юбориш орқали шахсий маълумотларини қўлга киритиб, унинг номига банк карта расмийлаштирган. Шундан сўнг Н.Ш.нинг банк картаси ҳисобида бўлган 61,5 млн сўм миқдоридаги пулларни ўзининг фойдаланувида бўлган банк картасига ўтказиб олган.
Мазкур ҳолат юзасидан А.А. ва Э.А.ларга нисбатан ЖКнинг 168-моддаси 3-қисми “г” банди (фирибгарлик ахборот тизимидан, шу жумладан ахборот технологияларидан фойдаланиб содир этилган бўлса) билан жиноят иши қўзғатилиб, тергов ҳаракатлари олиб борилмоқда.
Изоҳ (0)