Farg‘onada Telegram orqali zararli dasturlar tarqatib kelgan haker yigit qo‘lga olindi. Bu haqda IIV Kiberxavfsizlik markazi xabar berdi.
Ma’lum qilinishicha, Kiberxavfsizlik markazi xodimlari hamda Farg‘ona viloyati Kiberxavfsizlik bo‘limi xodimlari bilan hamkorlikda tezkor-qidiruv va texnik tadbirlar olib borilgan. Tadbirlar davomida Qo‘shtepa tumanida yashovchi 18 yoshli M.A. ismli shaxs Telegram messenjerida Cyber Education nomli kanalga kompyuter tizimiga zarar yetkazishi mumkin bo‘lgan turli xil dasturlarni joylashtirish orqali tarqatib kelgani aniqlanib, tegishli tartibda rasmiylashtirilib olindi.
Mazkur holat yuzasidan M.A.ga nisbatan Jinoyat kodeksining 278-6-moddasi (zarar keltiruvchi dasturlarni yaratish, ishlatish yoki tarqatish) 1-qismi bilan jinoyat ishi qo‘zg‘atilib, tergov harakatlari davom ettirilmoqda
Qonunchilikka muvofiq, bunday jinoiy xatti-harakatlar uchun bazaviy hisoblash miqdorining yuz baravaridan 300 baravarigacha miqdorda jarima yoki ikki yilgacha ozodlikni cheklash yoxud 2 yilgacha ozodlikdan mahrum qilish jazosi qo‘llanilishi mumkin.
Avvalroq Buxoro viloyatida ayolning fotosuratlariga maxsus dastur yordamida qayta ishlov berib, tarqatish bilan qo‘rqitib, pul talab qilgan shaxs qo‘lga olingani to‘g‘risida xabar berilgandi.
Izoh (0)