Yevropa Ittifoqi Eron Rossiyaga ballistik raketalar yetkazib bergani tasdiqlansa, unga qarshi sanksiyalar joriy qilishi mumkin. Bu haqda Yevrokomissiya rahbari Ursula fon der Lyayen Strasburgda Yevroparlament a’zolari oldidagi chiqishi chog‘ida ma’lum qildi.
“Agar Eron Rossiyaga ballistik raketalar yetkazib bersa, biz qo‘shimcha sanksiyalar bilan javob berishga tayyormiz”, — dedi Ursula fon der Lyayen.
21-fevral kuni Reuters agentligi Eron harbiy doiralaridagi olti manbaga tayanib, Tehron Moskvaga 400 dona “yer-yer” ballistik raketalarini yetkazib bergani haqida xabar berdi. Agentlik manbalariga ko'ra, yetkazib berish yanvar oyida boshlangan. Ismini oshkor etmagan Eron rasmiysining aytishicha, Tehron Moskvani raketalar bilan ta'minlashda davom etish niyatida.
Shundan so‘ng Davlat departamenti matbuot xizmati rahbari Metyu Miller Eron Rossiya bilan harbiy-texnik hamkorlikni kuchaytirsa, “tezkor va qattiq choralar” bilan tahdid qilgan.
2023-yil iyul oyida Ukraina qurolli kuchlari Rossiya armiyasi jangovar harakatlarda Rossiya hududida yig'ilgan Eronning Shahed dronlaridan foydalanishni boshlaganini e'lon qildi. O‘sha yilning dekabr oyida Yevropa Ittifoqi dronlar ishlab chiqarish bilan shug‘ullanuvchi beshta Eron kompaniyasiga qarshi sanksiyalar kiritdi.
Shundan so‘ng Eron tashqi ishlar vaziri Husayn Amir Abdullohiyyan, uning mamlakati hech qachon Rossiyaga Ukrainada foydalanish uchun dronlar va raketalar yetkazib bermaganini aytdi.
Izoh (0)