Ruminiya bosh vaziri Lyudovik Orban mamlakatda 6-dekabr kuni bo‘lib o‘tgan parlament saylovlaridan keyin iste’foga chiqdi, deb yozadi Romania-Insider.
Orbanning so‘zlariga ko‘ra, u Ruminiya hukumati rahbari lavozimiga yangi muddat uchun o‘z nomzodini qo‘ymaydi.
Shu bilan birga, u tarkibiga o‘ng markazchi partiyalar kiradigan bo‘lg‘usi koalitsiyani shakllantirish jarayonida ishtirok etishini ta’kidladi.
Prezident Klaus Yoxannis mudofaa vaziri Nikolaye Chukeni yangi parlament yangi hukumat uchun ovoz berguniga qadar vaqtinchalik bosh vazir etib tayinladi.
6-dekabr kuni Ruminiyada parlament saylovlari bo‘lib o‘tdi. Ovozlarning 96 foizi hisoblab chiqilganidan keyin ma’lum bo‘lishicha, muxolifatchi Sotsial-demokratik partiya (PSD) 29,69 foiz, hukmron Milliy liberal partiya (PNL) esa 25,18 foiz ovoz to‘plagan.
Ammo sotsial demokratlar hukumatni shakllantira olishi dargumon, chunki liberallarda potensial ittifoqchilar ko‘proq.
Izoh (0)