Samarqand viloyati Urgut tumanida kredit mablag‘larini o‘zlashtirgan MCHJ rahbari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Urgut tuman bo‘limi tomonidan tergovga qadar tekshiruv o‘tkazilgan. Tekshiruvda “Z.B.” MCHJ rahbari R.E. aholini sifatli oziq-ovqat mahsulotlari bilan taʼminlash maqsadida bank muassasasidan ajratilgan 2,2 milliard so‘m imtiyozli kredit evaziga kartoshka mahsulotini import qilmasdan ushbu mablag‘larni o‘zlashtirish yo‘li bilan talon-toroj qilgani hamda 497,9 million so‘m soliqlarni to‘lashdan bo‘yin tovlagani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 184-moddasi (soliqlar yoki yig‘imlarni to‘lashdan bo‘yin tovlash) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda fermer xo‘jaligi soxta hujjatlar orqali 420 ming dollardan ortiq kredit mablag‘ini o‘zlashtirib yuborgani aniqlangani to‘g‘risida xabar berilgandi. Shuningdek, Surxondaryo viloyatining Oltinsoy va Termiz tumanlarida 11 milliard so‘mdan ortiq kredit mablag‘larini o‘zlashtirgan MCHJ rahbarlari aniqlangandi. Surxondaryo va Farg‘onada esa oilaviy korxona rahbarlari 1,2 milliard so‘mdan ortiq imtiyozli kreditlarni talon-toroj qilgandi.
Izoh (0)