Qashqadaryo viloyati Ko‘kdala tumanida kredit mablag‘ini noqonuniy yo‘llar bilan naqdlashtirib olgan MCHJ rahbari aniqlandi, deb xabar beradi Bosh prokuratura huzuridagi departament.
Qayd etilishicha, departamentning Ko‘kdala tuman bo‘limi tomonidan tergovga qadar tekshiruv o‘tkazilgan. Tekshiruvda “X.F.” MCHJ rahbari X.X. ish yurituvchisi A.Y. va boshqalar hududiy tijorat banki filialidan ajratilgan 1,5 milliard so‘m kredit mablag‘lari evaziga shartnomada ko‘rsatilgan qurilish mollari va temir-beton mahsulotlarini sotib olmasdan ushbu mablag‘larning 1,2 milliard so‘mini “U.Q.” MCHJga o‘tkazish orqali naqdlashtirib olgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Xorazm viloyatida 1,4 milliard so‘m kredit mablag‘ini noqonuniy chetga olib chiqqan shaxslar aniqlangani to‘g‘risida xabar berilgandi.
Izoh (0)