Ўзбекистоннинг уч вилоятида: Сирдарё, Сурхондарё ва Наманганда кредит маблағларини ўзлаштириш ҳолатлари аниқланди. Бу ҳақда Иқтисодий жиноятларга қарши курашиш департаменти хабар берди.
Унга кўра, Бош прокуратура ҳузуридаги департаментнинг Сирдарё вилоят бошқармаси томонидан ўтказилган терговга қадар текширувда Сайхунобод туманида фаолият юритувчи “С-С.” МЧЖ масъул шахслари ҳудудий тижорат банки филиалидан ажратилган 1,6 миллиард сўм кредит маблағлари ҳисобидан маҳалла гузари ва маиший хизмат кўрсатиш цехини қурмасдан, кредит маблағларини бошқа мақсадларда сарфлаб талон-торож қилгани аниқланган.
Шунингдек, департаментнинг Наманган туман бўлими томонидан ўтказилган терговга қадар текширувда “Б.М.” МЧЖ собиқ раҳбари А.Қ. ва бошқалар 935 миллион сўм имтиёзли кредит маблағлари эвазига хориждан олиб келинган 4 турдаги жами 7 дона мебел ишлаб чиқариш дастгоҳларини бошқа шахсларга сотиб юбориб, ушбу маблағларини ўзлаштириш йўли билан талон-торож қилгани аниқланган.
Департаментнинг Жарқўрғон туман бўлими томонидан ўтказилган терговга қадар текширувда эса фуқаро Н.Ш. ҳамда тумандаги “И.” МФЙ бўйича ҳоким ёрдамчиси Х.М. 11 нафар фуқаро ва ЯТТ У.Т.нинг номига сохта ҳужжатларни расмийлаштириш орқали 698 миллион сўм кредит ажратиб, ушбу маблағларни ўзлаштириш йўли билан талон-торож қилгани аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)