Buxoro, Namangan, Andijon va Toshkent viloyatlarida kredit mablag‘larini o‘zlashtirish holatlari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning G‘ijduvon tuman bo‘limi tomonidan tergovga qadar tekshiruv o‘tkazilgan. Tekshiruv davomida “I.T.” va “A.L.” MCHJlar rahbari I.K. chorvachilik faoliyatini rivojlantirish uchun hududiy tijorat banki filialidan ajratilgan 4,2 milliard so‘m kredit mablag‘lari evaziga xarid qilingan chorva mollarini sotib yuborib, ushbu mablag‘larni o‘zlashtirish yo‘li bilan talon-toroj qilgani aniqlangan.
Departamentning Namangan viloyat boshqarmasi tomonidan “O‘zmilliybank” AJ Uchqo‘rg‘on bank xizmati markazining murojaatiga o‘tkazilgan tergovga qadar tekshiruvda “Z.7.” MCHJ rahbari J.S., “T.H.” MCHJ rahbari S.T. va boshqalar umumiy ovqatlanish shoxobchasi va tayyor taomlar yetkazib berish xizmatini tashkil etish maqsadida ajratilgan 800 million so‘m kredit mablag‘ini o‘zlashtirish yo‘li bilan talon-toroj qilgani ma’lum bo‘ldi.
Shu kabi, departamentning Andijon viloyat boshqarmasi tomonidan o‘tkazilgan tergovga qadar tekshiruvda “P.T.” MCHJ rahbari U.M., “T.M.” MCHJ rahbari I.M. va boshqalar tijorat banki filialidan tikuvchilik faoliyatini rivojlantirish va dastgohlar sotib olish uchun ajratilgan kredit mablag‘lari evaziga olingan 800 million so‘mlik 81 dona va 291,8 ming dollar qiymatidagi 26 dona tikuv dastgohlarini sotib yuborib, ushbu mablag‘larni o‘zlashtirish yo‘li bilan talon-toroj qilgani aniqlangan.
Departamentning Chirchiq shahar bo‘limi tomonidan o‘tkazilgan tergovga qadar tekshiruvda AT “Xalq banki” Chirchiq shahar filialidan “I.” MCHJga ajratilgan 735 million so‘m kredit mablag‘lari evaziga MCHJ rahbari A.E. go‘yoki “M.S” va “Sh.D” MCHJ qum, sement va sheben qabul qilib olganligi to‘g‘risida soxta hujjatlarni rasmiylashtirib, ushbu mablag‘larni o‘zlashtirish yo‘li bilan talon-toroj qilgani fosh etildi.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Buxoroda fermer xo‘jaligi soxta hujjatlar orqali 420 ming dollardan ortiq kredit mablag‘ini o‘zlashtirib yuborgani aniqlangani to‘g‘risida xabar berilgandi. Shuningdek, Surxondaryo viloyatining Oltinsoy va Termiz tumanlarida 11 milliard so‘mdan ortiq kredit mablag‘larini o‘zlashtirgan MCHJ rahbarlari aniqlangandi. Surxondaryo va Farg‘onada esa oilaviy korxona rahbarlari 1,2 milliard so‘mdan ortiq imtiyozli kreditlarni talon-toroj qilgandi.
Izoh (0)